കൊച്ചി: മുസ്ലിം ലീഗ് ചന്ദ്രിക വിവാദത്തിൽ നിർണ്ണായക വെളിപ്പെടുത്തിൽ നടത്തിയ മുൻ മന്ത്രി കെടി ജലീലിന് വധഭീഷണി. ഭീഷണി സന്ദേശം അയച്ചത് മുസ്ലിം ലീഗ് പ്രവർത്തകനാണെന്നാണ് കരുതുന്നത്. ലീഗിനെതിരെ സംസാരിക്കുമ്പോൾ സൂക്ഷിക്കണമെന്നും വണ്ടിയുടെ ബ്രേക്ക് ഒന്നു പോയാൽ മതിയെന്നും സന്ദേശത്തിൽ പറയുന്നു.
ഹംസ എന്നു സ്വയം പരിചയപ്പെടുത്തിയ ആളാണ് ജലീലിന് വാട്സാപ്പിലൂടെ ഭീഷണി സന്ദേശം അയച്ചത്. എന്നാൽ പേര് യഥാർത്ഥമാണോയെന്ന് വ്യക്തമല്ല. ചന്ദ്രിക വിവാദം ചർച്ചയായത് ജലീലിന്റെ വെളിപ്പെടുത്തലിനു പിന്നാലെയായിരുന്നു. മുസ്ലിം ലീഗിനെതിരെ സംസാരിക്കുമ്പോൾ ഇരിക്കുന്ന കൊമ്പാണ് ജലീൽ മുറിക്കുന്നതെന്നും തറവാട് മാന്തുമെന്നും ഭീഷണി സന്ദേശത്തിൽ പറയുന്നു. കോഴിക്കോട്, മലപ്പുറം ജില്ലകളിലെ പ്രാദേശിക ഭാഷാ ശൈലിയിലാണ് സന്ദേശം അയച്ചിരിക്കുന്നത്.
വാട്സാപ്പ് വോയിസ് മെസേജായാണ് ഭീഷണി സന്ദേശം ലഭിച്ചത്. കഴിഞ്ഞ കുറേ ദിവസങ്ങളായി മുസ്ലിം ലീഗ് നേതൃത്വത്തിനെതിരെയും കുഞ്ഞാലിക്കുട്ടിക്കെതിരെയും ജലീൽ രൂക്ഷമായ ആരോപണങ്ങളാണ് ഉന്നയിക്കുന്നത്. ഇതിനു പിന്നാലെയാണ് വധഭീഷണി. ഭീഷണിയുടെ പശ്ചാത്തലത്തിൽ പോലീസിൽ പരാതി നൽകിയെന്ന് വ്യക്തമാക്കി.
