കോഴിക്കോട്: പ്ലസ്വൺവിദ്യാർഥിയെ പീഡിപ്പിച്ച് ഗർഭിണിയാക്കിയ കേസിൽ പ്രതിക്ക് ജീവിതാന്ത്യം വരെ കഠിനതടവ്. കല്ലായി കപ്പക്കൽ മുണ്ടി പറമ്പിൽ വീട് മുഹമ്മദ് ഹർഷാദിനാണ് കോഴിക്കോട് പോക്സോ കോടതി ജീവിതാന്ത്യം വരെ കഠിനതടവ് വിധിച്ചത്. പിഴശിക്ഷക്കൊപ്പം പ്രതി ജീവിതാന്ത്യം വരെ കഠിന തടവിൽ ജയിലിൽ കഴിയണമെന്ന് കോടതി വിധിച്ചു. പിഴത്തുകയിൽ ഒരു ലക്ഷം രൂപ ഇരയ്ക്ക് നഷ്ടപരിഹാരമായി നൽകും.
വയറുവേദനയാണെന്ന് പറഞ്ഞ പെൺകുട്ടി പുലർച്ചെ കുളിമുറിയിൽ പ്രസവിച്ചതോടെയാണ് പീഡനവിവരം വീട്ടുകാർ അറിയുന്നത്. ഉടൻ പെൺകുട്ടിയേയും കുഞ്ഞിനേയും ആശുപത്രിയിൽ എത്തിച്ചു. പോലിസിൽ പരാതിയും നൽകി. പിന്നീട് നടന്ന അന്വേഷണത്തിലാണ് മുഹമ്മദ് ഹർഷാദ് പിടിയിലായത്.
പ്രേമം നടിച്ച് വിവാഹ വാഗ്ദാനം നൽകി പെൺകുട്ടിയെ പീഡിപ്പിക്കുകയായിരുന്നു പ്രതിയെന്ന് പോലീസ് കണ്ടെത്തി. വെള്ളയിൽ പോലീസ് ഇൻസ്പെക്ടർ ജി. ഗോപകുമാറും സംഘവുമാണ് അന്വേഷണം നടത്തിയത്. അഡീഷണൽ ജില്ല & സെഷൻസ് ജഡ്ജ് ദിനേശ്.സി.ആർ ആണ് ശിക്ഷ വിധിച്ചത്. അപൂർവ്വവും മാതൃകാപരവുമായ ശിക്ഷാവിധിയാണെന്ന് കേസിൽ ഹാജരായ സ്പെഷൽ പബ്ലിക് പ്രോസിക്യൂട്ടർ അഡ്വ. സുനിൽ കുമാർ പറഞ്ഞു.
content highlights:court sentences life imprisonment till death in pocso case
