ആര്‍ടി ഓഫീസില്‍ ഉണ്ടായ നാശനഷ്ടങ്ങളുടെ പിഴ എത്രയായാലും അത് ഒടുക്കാമെന്ന് ഇ ബുൾ ജെറ്റ് സഹോദരങ്ങളുടെ അഭിഭാഷകൻ കണ്ണൂര്‍ ചീഫ് ജുഡീഷ്യല്‍ മജിസ്‌ട്രേറ്റ് കോടതിയെയാണ് അറിയിച്ചത്. കേസില്‍ വാദം കേള്‍ക്കവെയാണ് അഭിഭാഷകന്‍ ഇക്കാര്യം അറിയിച്ചത്. ആര്‍ടി ഓഫീസില്‍ ഉണ്ടാക്കിയ നാശനഷ്ടങ്ങളുടെ കണക്ക് ബോധ്യപ്പെടുത്താൻ കോടതി നിര്‍ദേശം നല്‍കിയതായും റിപ്പോർട്ട് പറയുന്നു.
പൊതുമുതൽ നശിപ്പിച്ചതുൾപ്പെടെ നിരവധി വകുപ്പുകളാണ് ഇരുവർക്കുമെതിരെ ചുമത്തിയിരിക്കുന്നത്. പൊതുമുതൽ നശീകരണം തടയൽ നിയമത്തിലെ 3(1) വകുപ്പ് പ്രകാരമാണ് കേസ്. കൃത്യം നിർവഹണം തടസപ്പെടുത്തി, മോട്ടോർവാനവകുപ്പ് ഉദ്യോഗസ്ഥർക്കെതിരെ ഭീഷണി മുഴക്കി തുടങ്ങി വിവിധ വകുപ്പുകളാണ് ഇവർക്കെതിരെ ചുമത്തിയിരിക്കുന്നത്.
അതേസമയം കള്ളക്കേസിൽ കുടുക്കി ജയിലടക്കാനാണ് പോലീസിന്‍റെ ശ്രമമെന്നാണ് ഇ ബുൾ ജെറ്റ് സഹോദരങ്ങളുടെ അഭിഭാഷകൻ മുഹമ്മദ് ഫൗസ് ആരോപിക്കുന്നത്. ഇന്നലെയായിരുന്നു വ്ളോഗർമാരായ ലിബിനും എബിനും അറസ്റ്റിലാകുന്നത്. വാഹനത്തിൽ വരുത്തിയ രൂപമാറ്റത്തിന് പിഴയൊടുക്കാൻ ആവശ്യപ്പെട്ടതിന് പിന്നാലെ കണ്ണൂർ ആർടിഒ ഓഫീസിൽ ബഹളം വെച്ചതിനായിരുന്നു പോലീസ് ഇരുവരെയും അറസ്റ്റ് ചെയ്തത്.
അറസ്റ്റ് സമയത്ത് പോലീസ് തങ്ങളെ മർദ്ദിക്കുന്നെന്ന് പറഞ്ഞ് ഇവർ സമൂഹമാധ്യമങ്ങളിൽ വീഡിയോ പോസ്റ്റ് ചെയ്തിരുന്നു. ഇതിന് പിന്നാലെ യൂട്യൂബർമാരും ആരാധകരും ഓഫീസ് പരിസരത്ത് തടിച്ച് കൂടിയിരുന്നു.
