തിരുവനന്തപുരം: പത്തനംതിട്ട ജില്ലയിൽ കോവിഡ് വാക്സിൻ രണ്ട് ഡോസുമെടുത്തിട്ടും വൈറസ് ബാധ സ്ഥിരീകരിച്ചുവെന്ന കേന്ദ്ര റിപ്പോർട്ടിൽ വിശദീകരണവുമായി ആരോഗ്യമന്ത്രി വീണാ ജോർജ്. യഥാർത്ഥത്തിൽ കേന്ദ്ര റിപ്പോർട്ട് വാക്സിനേഷന്റെ ഫലപ്രാപ്തിയെ സൂചിപ്പിക്കുന്നുവെന്നാണ് മന്ത്രി പറയുന്നത്.
ജില്ലയിൽ രണ്ടാം ഡോസ് സ്വീകരിച്ച് 15 ദിവസം കഴിഞ്ഞ ശേഷം കോവിഡ് ബാധിച്ചവരുടെ എണ്ണം 258 ആണ്. ഇതിൽ വെറും നാല് പേർ മാത്രമാണ് മരിച്ചതെന്നും അവരെല്ലാവരും 80 വയസ്സിന് മുകളിൽ പ്രായമുള്ളവരും മറ്റ് ആരോഗ്യപ്രശ്നങ്ങളുള്ളവരുമായിരുന്നു. ബാക്കിയുള്ള 254 പേർക്കും ഗുരുതരമായി കോവിഡ് ബാധിച്ചില്ല എന്നത് വാക്സിനേഷന്റെ ഫലപ്രാപ്തിയാണ്സൂചിപ്പിക്കുന്നതെന്നും മന്ത്രി പറഞ്ഞു.
അതേസമയം വാക്സിനേഷൻ സംബന്ധിച്ച് തെറ്റായ പ്രചാരണങ്ങളുണ്ടാകാതിരിക്കാൻ മാധ്യമങ്ങളുടെ സഹകരണം വേണമെന്നും അവർ കൂട്ടിച്ചേർത്തു. രണ്ടാം ഡോസ് വാക്സിനെടുത്ത ശേഷം 5042 പേർക്കാണ് കോവിഡ് ബാധിച്ചത്. ഇതിൽ 15 ദിവസം കഴിഞ്ഞ ശേഷം വൈറസ് ബാധിച്ചത് 258 പേർക്കാണ്. 15 ദിവസം കഴിഞ്ഞ ശേഷമാണ് വാക്സിന്റെ ഫലപ്രാപ്തി സംബന്ധിച്ച് കൃത്യമായി അറിയാൻ കഴിയുക.
വാക്സിനെടുത്തവരെ സംബന്ധിച്ച് രോഗം വരാനുള്ള സാധ്യത കുറവാണ് എന്നത് പോലെ രോഗം വന്നാൽ തന്നെ അത് ഗുരുതരമാകാനോ മരണം സംഭവിക്കാനോ ഉള്ള സാധ്യതയും കുറവാണെന്നും കേന്ദ്ര റിപ്പോർട്ട് അടിവരയിടുന്നുവെന്ന് മന്ത്രി പറഞ്ഞു.ബ്രേക് ത്രൂ ഇൻഫെക്ഷൻ കേരളത്തിലുണ്ടെന്നത് നേരത്തെ തന്നെ നിയമസഭയിൽ പറഞ്ഞിട്ടുള്ളതാണെന്നും മന്ത്രി വ്യക്തമാക്കി.
പത്തനംതിട്ട ജില്ലയിൽ ഒന്നാം ഡോസ് സ്വീകരിച്ച 14,000ൽ അധികം ആളുകൾക്കും കോവിഡ് സ്ഥിരീകരിച്ചിരുന്നു. വാക്സിൻ വിതരണത്തിൽ എന്തെങ്കിലും അപാകതയുണ്ടോ എന്ന് പരിശോധിക്കാനും കേരളത്തിലെ രോഗവ്യാപനം പഠിക്കാനെത്തിയ ആറംഗ സംഘത്തിന്റെ റിപ്പോർട്ടിന്റെ അടിസ്ഥാനത്തിൽ കേന്ദ്രം നിർദേശിച്ചിരുന്നു.
Content Highlights: Veena George on covid positive despite two shots of covid vaccination
