സ്വതന്ത്ര ഡോക്യുമെന്ററി ഫിലിം നിർമാതാവായ സെനെറ്റ് അടുത്തിടെ ഈ നഗരം സന്ദർശിച്ചു. ‘ഡിസ്കവർ വിത്ത് സെനെറ്റ്’ എന്ന് പേരുള്ള യൂട്യൂബിൽ ചാനലിൽ സെനെറ്റ് യക്കൂട്സ്ക് നഗരത്തിൽ എങ്ങനെയാണ് ജനങ്ങൾ അധിവസിക്കുന്നത് എന്ന് വിവരിക്കുന്നുണ്ട്. എങ്ങനെ എന്ന് മനസ്സിലാക്കിയാൽ ഒരു പക്ഷെ നമ്മൾ മലയാളികൾ ‘കേരളത്തിൽ എന്തൊരു ചൂടാണ്’ എന്ന് പരിതപിക്കുന്നത് എന്നന്നേക്കുമായി നിർത്തിയേക്കും.
ഒരു സിനിമയിൽ മമ്മൂട്ടി കഥാപാത്രം പറയുന്നതുപോലെ ‘ഒരു പ്രത്യേക തരം ജീവിതം’ ആണ് ഇവിടത്തുകാർ നയിക്കുന്നത്. വാഹനവുമായി നഗരത്തിലേക്കിറങ്ങിയാൽ ഇവിടെ ആരും വണ്ടി ഓഫ് ചെയ്യില്ല. ഷോപ്പിങ്ങിന് പോകുമ്പോഴും വണ്ടി സ്റ്റാർട്ട് ചെയ്തിടും. ഇല്ലെങ്കിൽ തിരികെ വരുമ്പോൾ എൻജിൻ ഓയിൽ, ഇന്ധനം എന്നിവ തണുത്തുറഞ്ഞ് വാഹനം ഡ്രൈവ് ചെയ്യാൻ പറ്റില്ല. പലരും വീടുകളിൽ ചൂടാക്കാവുന്ന കാർ പോർച്ചിലാണ് വാഹനങ്ങൾ സൂക്ഷിക്കുന്നത്.
നഗരത്തിലെ പല ഫ്ളാറ്റുകളുടെയും ജനാലകളിൽ മാംസം കവറിലാക്കി തൂക്കിയിട്ടിരിക്കുന്നത് കാണാം. ഫ്രിഡ്ജിനെക്കാൾ തണുപ്പ് അന്തരീക്ഷത്തിനുള്ളപ്പോൾ മാംസം എന്തിനാണ് ഫ്രിഡ്ജിൽ സൂക്ഷിക്കേണ്ട കാര്യം. ഒരു കപ്പിൽ തിളച്ച വെള്ളം കൊണ്ടുവന്ന സെനറ്റ് അത് അന്തരീക്ഷത്തിലേക്ക് ഒഴിക്കുകയും തൽക്ഷണം മഞ്ഞായി മാറുന്നതും വിഡിയോയിലുണ്ട്.
യാത്രക്കിടെ കാർ കേടായാൽ ഉടൻ അതുപേക്ഷിച്ചു കിട്ടുന്ന വാഹനത്തിൽ രക്ഷപ്പെടുക എന്നതാണ് ഇവിടത്തെ രീതി. ഓൺ ചെയ്യാൻ പറ്റാതെ കേടായ കാറിൽ ഹീറ്റർ ഇല്ലാതെ 5 മിനുറ്റിൽ കൂടുതൽ ഇരുന്നാൽ ഒരുപക്ഷെ ആൾക്ക് ജീവഹാനി സംഭവിക്കും.
ഒരു പഴം മഞ്ഞിൽ ഇട്ട ശേഷം കുറച്ച് സമയത്തിന് ശേഷം സെനറ്റ് അതെടുക്കുമ്പോൾ കല്ല് പോലിരിക്കുന്നത് വിഡിയോയിൽ കാണിക്കുന്നുണ്ട്. പിന്നീട് ഒരു മരക്കഷണത്തിൽ ഒരു ആണി അടിച്ചു കേറ്റുന്നതും ഈ കല്ലുപോലെ തണുത്തുറഞ്ഞ പഴംകൊണ്ട്. അല്പം അല്ല, ഏറെ വിചിത്രമാണ് ഇവിടെ കാര്യങ്ങൾ. ജീവിതം ഒരു യുദ്ധവും.
