അഴീക്കോട് > കാറും ബൈക്കും കൂട്ടിയിടിച്ച് ബൈക്ക് യാത്രക്കാരനായ യുവാവ് മരിച്ചു. സ്വര്ണക്കടത്ത് കേസില് അറസ്റ്റിലായ അര്ജുന് ആയങ്കിയുടെ സുഹൃത്ത് അഴീക്കോട് കപ്പക്കടവിലെ റമീസ് (25) ആണ് മരിച്ചത്. ഇന്നലെ അര്ധരാത്രിയോടെയാണ് അപകടം നടന്നത്. മാതാവിനെ ബന്ധു വീട്ടിലാക്കി തിരിച്ചു വരികയായിരുന്ന റമീസ് സഞ്ചരിച്ച കെ.എല് 13 എ.ജെ 7004 നമ്പര് ബൈക്കും കെ.എല് 13 വൈ 5500 നമ്പര് കാറും കപ്പക്കടവില് വെച്ച് കൂട്ടിയിടിക്കുയായിരുന്നു.
വാരിയെല്ലുകള്ക്കും തലയ്ക്കും ഗുരുതരമായി പരിക്കേറ്റ റമീസിനെ കണ്ണൂരിലെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു. ഇന്ന് പുലര്ച്ചയോടെയാണ് മരണപ്പെട്ടത്. വിദേശത്തായിരുന്ന റമീസ് സമീപകാലത്താണ് നാട്ടിലെത്തിയത്. സ്വര്ണക്കടത്ത് കേസുമായി ബന്ധപ്പെട്ട് നേരത്തെ റമീസിനെ കസ്റ്റംസ് ചോദ്യം ചെയ്തിരുന്നു. അര്ജുന് ആയങ്കിയുടെ അടുത്ത സുഹൃത്തായിരുന്നു റമീസ്.
സ്വര്ണക്കടത്ത് കേസില് അര്ജുന് ആയങ്കിക്കൊപ്പം തന്നെ റമീസിനും ബന്ധമുണ്ട് എന്ന സംശയത്തെ തുടര്ന്ന് ഇദ്ദേഹത്തിന്റെ വീട്ടില് കസ്റ്റംസ് റെയ്ഡ് നടത്തിയിരുന്നു. എന്നാല് റെയ്ഡില് പ്രത്യേകിച്ചൊന്നും കണ്ടെത്താന് സാധിച്ചിരുന്നില്ല. കെ.സി ഹൗസില് റഫീഖ്-നസീമ ദമ്പതികളുടെ മകനാണ് റമീസ്. സഹോദരങ്ങള്: റസാഖ്, റെജി നാസ്. വളപട്ടണം പോലിസ് ഇന്ക്വസ്റ്റ് നടത്തി.
