കൊവിഡ് 19 മഹാമാരിയ്ക്കു പിന്നാലെ പ്രഖ്യാപിച്ച ലോക്ക് ഡൗണിൻ്റെ സാഹചര്യത്തിലായിരുന്നു സംസ്ഥാന സര്‍ക്കാര്‍ സൗജന്യ ഭക്ഷ്യകിറ്റ് നല്‍കിത്തുടങ്ങിയത്. എന്നാൽ ചരിത്രത്തിലാദ്യമായി ഭരണത്തുടര്‍ച്ച നേടിയ സാഹചര്യത്തിൽ ആദ്യ ഓണത്തിന് വിപുലമായ പട്ടികയോടു കൂടിയ ഭക്ഷ്യകിറ്റ് നല്‍കാൻ സര്‍ക്കാര്‍ പദ്ധതിയിടുകയായിരുന്നു. ജൂലൈ മാസത്തിൽ കിറ്റ് നല്‍കാത്ത സാഹചര്യത്തിൽ ഓണവിഭവങ്ങള്‍ ഉള്‍പ്പെടെ ഉള്‍ക്കൊള്ളിച്ച് 17 ഇന കിറ്റ് നല്‍കാനായിരുന്നു നീക്കം.
Also Read:
ഭക്ഷ്യകിറ്റിനൊപ്പം കുട്ടികള്‍ക്കായി ചോക്കളേറ്റ് കൂടി ഉള്‍പ്പെടുത്താൻ ഭക്ഷ്യവകുപ്പ് പദ്ധതിയിട്ടിരുന്നു. എന്നാൽ ഇത് പിന്നീട് പരിഷ്കരിച്ച് ചോക്കളേറ്റ് ക്രീം ബിസ്കറ്റ് നല്‍കാനായിരുന്നു ആലോചന. ഇതിനായി പ്രമുഖ കമ്പനിയുടെ 30 രൂപ വിലയുള്ള ബിസ്കറ്റ് മൊത്തത്തിൽ വാങ്ങാനായിരുന്നു നീക്കം. മൊത്തവില നല്‍കി വാങ്ങുന്ന ബിസ്കറ്റ് 90 ലക്ഷം റേഷൻ കാര്‍ഡ് ഉപഭോക്താക്കളുടെ കിറ്റിൽ ഉള്‍പ്പെടുത്തുന്നതോടെ സംസ്ഥാന സര്‍ക്കാരിന് 22 കോടി രൂപയായിരുന്നു അധികബാധ്യതയായി ഉണ്ടാകുക.
17 ഇന ഓണക്കിറ്റ് വിതരണം ചെയ്യാനായി 592 കോടി രൂപ വേണ്ടിവരുമെന്ന് ഭക്ഷ്യവകുപ്പ് സര്‍ക്കാരിനെ അറിയിക്കുകയായിരുന്നു. ഇതിൽ ക്രീം ബിസ്കറ്റിനു മാത്രമായി 22 കോടി രൂപ വേണ്ടി വരുമെന്നു കാണിച്ചതോടെ മുഖ്യമന്ത്രി ബിസ്കറ്റ് കട്ടികയിൽ നിന്ന് ഒഴിവാക്കാൻ നിര്‍ദേശിക്കുകയായിരുന്നു. സംസ്ഥാന സര്‍ക്കാര്‍ നേരിടുന്ന സാമ്പത്തിക പ്രതിസന്ധി കണക്കിലെടുത്തായിരുന്നു തീരുമാനം. ബിസ്കറ്റ് ഒഴിവാക്കുന്നതോടെ ബാധ്യത 570 കോടിയായി കുറയും.
Also Read:
ഓണത്തിനു മുൻപായി കിറ്റ് വിതരണം പൂര്‍ത്തിയാക്കാനായി 16 ഭക്ഷ്യവസ്തുക്കളുടെ പട്ടിക അടങ്ങിയ ഉത്തരവും ഭക്ഷ്യവകുപ്പ് പുറത്തിറക്കിയിട്ടുണ്ട്.
