കാൻവാർ കേസിൽ കോടതി പറഞ്ഞതൊക്കെ കേരളത്തിനും ബാധകമാണ്. നൽകിയ ഇളവുകൾ കൊവിഡ് സാഹചര്യം ഗുരുതരമാക്കിയാൽ കേരളം പ്രത്യാഘാതം നേരിടേണ്ടിവരും. സർക്കാർ നൽകിയ ഇളവുകൾ ഇന്ന് അവസാനിക്കുന്ന സാഹചര്യത്തിലാണ് ഉത്തരവ് റദ്ദാക്കാത്തത്. ഹർജി നേരത്തെ ലഭിച്ചിരുന്നുവെങ്കിൽ അത്തരത്തിൽ നടപടി സ്വീകരിക്കുമായിരുന്നുവെന്നും ജസ്റ്റിസ് റോഹിംഗ്ടണ് നരിമാൻ, ജസ്റ്റിസ് ബിആർ ഗവായ് എന്നിവരടങ്ങിയ ബെഞ്ച് വ്യക്തമാക്കി.
കൊവിഡ് കേസുകൾ ഉയർന്ന തോതിലുള്ള കാറ്റഗറി ഡി പ്രദേശങ്ങളിൽ കടകൾ തുറക്കാൻ അനുവാദം നൽകിയത് ഗുരുതര വിഷയമാണ്. മതപരമായ ആചാരങ്ങളേക്കാൾ വലുതാണ് പൗരൻ്റെ ജീവിക്കാനുള്ള അവകാശം. അഞ്ചു ശതമാനം ടിപിആര്‍ ഉള്ള സ്ഥലങ്ങളില്‍ അവശ്യസാധനങ്ങള്‍ വില്‍ക്കാന്‍ നേരത്തെ അനുമതി നൽകിയിട്ടില്ലെന്നും സുപ്രീം കോടതി നിരീക്ഷിച്ചു. കൊവിഡ് കേസുകൾ ഉയർന്ന തോതിൽ തുടരുമ്പോൾ കേരളം ഇളവുകൾ നൽകി ജനങ്ങളുടെ ജീവൻവച്ച് കളിക്കുകയാണെന്ന് വ്യക്തമാക്കി മലയാളിയും ഡൽഹി വ്യവസായിയുമായ പി കെ ഡി നമ്പ്യാരാണ് സുപ്രീം കോടതിയെ സമീപിച്ചത്.
നിയന്ത്രണങ്ങൾ നീണ്ടതോടെ ജനം അസ്വസ്ഥരാണെന്നും ലോക്ക്ഡൗൺ അനന്തമായി നീട്ടാൻ കഴിയില്ലെന്നുമാണ് സംസ്ഥാന സർക്കാർ സുപ്രീം കോടതിയിൽ നൽകിയ വിശദീകരണത്തിൽ വ്യക്തമാക്കിയിരുന്നത്. ഇളവുകൾ ആവശ്യപ്പെട്ട് പ്രതിപക്ഷവും വ്യാപാരികളും രംഗത്തുവന്നിരുന്നു. നിയന്ത്രണങ്ങൾ ജനങ്ങളുടെ ജീവിതത്തെ സാരമായി ബാധിച്ചിരുന്നതിനാലാണ് ബ്രക്രീദിന് മുൻപുള്ള മൂന്ന് ദിവസം ഇളവുകൾ നൽകിയതെന്നും സർക്കാർ കോടതിയിൽ പറഞ്ഞിരുന്നു.
