ബലിപെരുന്നാള് ആഘോഷത്തിന് കേരള സര്ക്കാര് നൽകിയ കൊവിഡ്-19 നിയന്ത്രണങ്ങളിലെ ഇളവുകളിൽ രൂക്ഷ വിമർശനം നടത്തി രാജ്യത്തെ ഡോക്ടര്മാരുടെ സംഘടന, ഇന്ത്യൻ മെഡിക്കൽ അസോസിയേഷൻ (ഐഎംഎ).
ഇളവുകള് കൊവിഡ് വ്യാപന തീവ്രത രൂക്ഷമാക്കും എന്ന് നിരീക്ഷിച്ച ഐ.എം.എ വിദഗ്ധ ഉപദേശം തേടാതെയാണ് കേരളത്തിന്റെ നടപടിയെന്ന് ആരോപിക്കുന്നു.
കൊവിഡ് കാലത്തെ ആൾക്കൂട്ടങ്ങള്ക്ക് എതിരെ വിവിധ സംസ്ഥാനങ്ങളില് ഐ.എം.എ നിയമപോരാട്ടത്തിലാണ്. കൊവിഡ് വാക്സിന് എതിരെയുള്ള അശാസ്ത്രീയമായ പ്രസ്താവനകളുടെ പേരിൽ യോഗ ഗുരു ബാബാ രാംദേവിനെതിരെ ഐ.എം.എ നിയമനടപടി സ്വീകരിച്ചു.
ഉത്തരേന്ത്യന് സംസ്ഥാനങ്ങള് കന്വാര് യാത്ര നടത്താനുള്ള തീരുമാനത്തിന് എതിരെയും ഐ.എം.എ രൂക്ഷമായാണ് പ്രതികരിച്ചത്. പിന്നീട് കോടതി ഇടപെട്ട കന്വാര് യാത്ര റദ്ദാക്കാന് സംസ്ഥാനങ്ങളോട് സമ്മര്ദ്ദം ചെലുത്തിയിരുന്നു.
കേരളത്തില് അയഞ്ഞ നിയന്ത്രണങ്ങള്
ഞായറാഴ്ച്ച മുതലാണ് ബക്രീദ് പ്രമാണിച്ചുള്ള ഇളവുകൾ സംസ്ഥാനത്ത് തുടങ്ങിയത്. വാരാന്ത്യ ലോക്ക്ഡൗണിലും ഇളവ് നൽകിയിട്ടുണ്ട്. അതിതീവ്ര വ്യാപനമുള്ള ഡി മേഖലയിലടക്കം എല്ലാ കടകളും തുറന്ന് പ്രവർത്തിക്കാന് അനുമതി നൽകിയതായി മുഖ്യമന്ത്രി വാർത്താ സമ്മേളനത്തിൽ അറിയിച്ചിരുന്നു.
മുൻപ് ആവശ്യ വസ്തുക്കളുടെ കടകൾ തുറക്കാന് മാത്രമേ അനുമതി ഉണ്ടായിരുന്നുള്ളൂ. ഇങ്ങനെ ഇളവ് നൽകുന്നത് ജനങ്ങൾ കൂട്ടത്തോടെ ഒത്തുകൂടാൻ ഇടയാക്കുമെന്നും അത് നിലവിലെ അവസ്ഥ കൂടുതൽ സങ്കീർണമാക്കുമെന്നാണ് ഐ.എം.എ പറയുന്നത്.
വേണ്ടി വന്നാൽ കേരളത്തിനെതിരെ സുപ്രീം കോടതിയിൽ പോകാനും ഒരുക്കമാണ് എന്ന നിലപാടിലാണ് ഐ.എം.എ.
മൂന്ന് ദിവസവും എ, ബി, സി എന്നീ മൂന്ന് വിഭാഗങ്ങളിലും അവശ്യ വസ്കുക്കൾ വിൽക്കുന്ന കടകൾക്കു പുറമേ തുണിക്കട, ചെരുപ്പുകട, ജ്വല്ലറി, ഇലക്ട്രോണിക്സ്, ഫാൻസി വസ്തുക്കൾ വിൽക്കുന്ന കടകളെല്ലാം തന്നെ തുറക്കാം. രാത്രി 8 മണി വരെയാണ് എല്ലാത്തരം കടകൾക്കും പ്രവർത്തിക്കാനുള്ള അനുമതി.
എന്നാൽ ഏറെ കാലത്തെ കടുത്ത നിയന്ത്രണങ്ങൾക്ക് ശേഷം പെട്ടെന്ന് കിട്ടയ ഇളവുകൾ ആഘോഷമാക്കി നിരത്തിലിറങ്ങിയതാണ് ഇപ്പോഴത്തെ വിവാദങ്ങൾക്ക് വഴിവെച്ചിരിക്കുന്നത്. ഞായറാഴ്ച്ച ഒരുവിധം എല്ലാ നിരത്തുകളിലും അപകടകരമായ വിധം തിരക്ക് അനുഭവപ്പെടുകയും ചിത്രങ്ങൾ സമൂഹ മാധ്യമങ്ങളിലടക്കം വൈറലാവുകയും ചെയ്തു.
മൂന്നാം തരംഗം പരമാവധി കുറയ്ക്കാൻ ടൂറിസവും മതപരമായ ചടങ്ങുകളും ഒഴിവാക്കണം എന്ന് പ്രധാനമന്ത്രിയുടേയും സുപ്രീം കോടതിയുടേയും നിർദേശമുണ്ട്. കേരളവും മഹാരാഷ്ട്രയും ഒഴികെ മറ്റെല്ലാ സംസ്ഥാനങ്ങളും രണ്ടാം തരംഗം അവസാനിപ്പിച്ചെങ്കിലും ഈ രണ്ട് സംസ്ഥാനങ്ങളിലും കേസുകൾ ഇപ്പോഴും വളരെ അധികമാണ്- ഐഎംഎ ദേശിയ പ്രസിഡന്റ് ഡോ. ജെഎ ജയലാൽ, സെക്രട്ടറി ജനറൽ ഡോ. ജയേഷ് ലെലെ എന്നിവർ ഞായറാഴ്ച്ച സംയുക്ത വാർത്താ കുറിപ്പിൽ അറിയിച്ചു.
ബക്രീദ് പ്രമാണിച്ചുള്ള കേരളത്തിന്റെ ഇളവുകൾ തീർത്തും നിരുത്തരവാദപരമാണെന്നും മെഡിക്കൽ എമർജൻസിക്ക് കാരണമായേക്കാമെന്നും പ്രസ്താവനയിൽ ഐ.എം.എ ആരോപിക്കുന്നു.
ഐ.എം.എക്ക് പുറമേ കേരളത്തിന്റെ നടപടിയെ രൂക്ഷമായ ഭാഷയിൽ മുതിർന്ന കോൺഗ്രസ് നേതാവ് മനു അഭിഷേക് സിങ്വിയും വിമര്ശിച്ചു. ഉത്തർപ്രദേശിലെ കൻവാർ യാത്ര നടത്തുന്നത് തെറ്റാണെങ്കിൽ ഇവിടെ പെരുന്നാൾ ആഘോഷവും തെറ്റ് തന്നെയാണ്. പോരാത്തതിന് കേരളം ഇപ്പോഴും കൊവിഡ് കിടക്കയിൽ തന്നെയാണെന്ന കാര്യം മറക്കേണ്ടെന്നും അദ്ദേഹം ട്വീറ്റ് ചെയ്തു.
ഉടൻ തന്നെ കേരളം ഇളവുകൾ എടുത്ത് കളയണമെന്നും യാതൊരു തരത്തിലുമുള്ള മൃദു സമീപനങ്ങളും കാണിക്കരുതെന്നുമുള്ള ഉറച്ച നിലപാടിലാണ് ഐ.എം.എ. കലണ്ടറിലെ ഈദ് അവധി ദിനമായ ജൂലൈ 20ന് പ്രവൃത്തി ദിനമാണെന്നാണ് സര്ക്കാര് പുതിയ ഉത്തരവ്. 21-നായിരിക്കും സംസ്ഥാനത്ത് ബലിപെരുന്നാള്.
****
