കോഴിക്കോട്: കുറ്റ്യാടിയിൽ നിയമസഭാ തിരഞ്ഞെടുപ്പുമായി ബന്ധപ്പെട്ടുണ്ടായ പ്രതിഷേധങ്ങളിൽകടുത്ത അച്ചടക്ക നടപടിയുമായി സി.പി.എം. പാർട്ടി നേതാവ് കെ.പി കുഞ്ഞഹമ്മദ് കുട്ടി മാസ്റ്റർക്ക് സീറ്റ് നിഷേധിച്ചതിൽ പ്രതിഷേധിച്ചുള്ള പ്രക്ഷോഭത്തിലാണ് നടപടി. കുറ്റ്യാടി ലോക്കൽ കമ്മിറ്റി പൂർണമായും പിരിച്ചുവിട്ടു. ഇവിടെ അഡ്ഹോക്ക് കമ്മിറ്റിയെ നിയോഗിക്കും.
ഏരിയാ കമ്മിറ്റി അംഗങ്ങളായ കെ.പി ചന്ദ്രി, മോഹൻദാസ് എന്നിവരെ തരംതാഴ്ത്തി. കൂടുതൽ പേർക്കെതിരെ നടപടിയുണ്ടാകുമെന്നാണ് സൂചന. കുറ്റ്യാടിയിൽ കൂടുതൽ നടപടികളുണ്ടാകുമെന്ന് ജില്ലാ കമ്മിറ്റിയിൽ തീരുമാനമായിരുന്നു. ഇന്ന് ചേർന്ന ഏരിയാ കമ്മിറ്റി യോഗത്തിലാണ് അന്തിമ തീരുമാനമുണ്ടായത്.
വളയം, കുറ്റ്യാടി എന്നിങ്ങനെ മണ്ഡലത്തിൽ രണ്ട് ലോക്കൽ കമ്മിറ്റികളാണ് ഉണ്ടായിരുന്നത്. കൂടുതൽ നേതാക്കൾക്കെതിരെ നടപടിയുണ്ടാകുമെന്നാണ് സൂചന. സംഘടനാവിരുദ്ധ പ്രവർത്തനമുണ്ടായി എന്നാണ് പാർട്ടി വിലയിരുത്തൽ. പ്രക്ഷോഭവുമായി രംഗത്തിറങ്ങിയവരെ പിന്തിരിപ്പിക്കുന്നതിന് പകരം പിന്തുണയ്ക്കുന്ന തരത്തിൽ വിഭാഗീയതയാണ് അരങ്ങേറിയതെന്നും സി.പി.എം വിലയിരുത്തുന്നു.
നേരത്തെ സ്ഥലം എം.എൽ.എ കുഞ്ഞഹമ്മദ് കുട്ടി മാസ്റ്റർക്കെതിരെയും സിപിഎം അച്ചടക്ക നടപടിയെടുത്തിരുന്നു. നിയമസഭാ തിരഞ്ഞെടുപ്പിൽ കുറ്റ്യാടി മണ്ഡലം കേരള കോൺഗ്രസിനാണ് നൽകിയിരുന്നത്. ഇതിൽ വലിയ പ്രതിഷേധമുയർന്നുവന്നിരുന്നു. ആയിരക്കണക്കിനാളുകൾ കുഞ്ഞഹമദ് കുട്ടി മാസ്റ്റർക്കായി തെരുവിലിറങ്ങിയിരുന്നു. ഇത് പാർട്ടി സംസ്ഥാന നേതൃത്വത്തെ പോലും ഞെട്ടിച്ചിരുന്നു.
അന്ന് പ്രതിഷേധങ്ങൾക്ക് വഴങ്ങി സീറ്റ് സി.പി.എം ഏറ്റെടുത്തെങ്കിലും പാർട്ടി സമ്മേളനത്തിന് മുന്നോടിയായി അച്ചടക്ക നടപടി കടുപ്പിക്കുന്നതിലൂടെ പാർട്ടിയെ ജനം തിരുത്തേണ്ട എന്ന സന്ദേശം തന്നെയാണ് സി.പി.എം നൽകുന്നത്.
Content Highlights: CPM takes more disciplinary actions in Kuttiyadi
