എട്ട് സ്കോളര്‍ഷിപ്പുകളാണ് ന്യൂനപക്ഷ ക്ഷേമ ഡയറക്ടറേറ്റ് വിതരണം ചെയ്യുന്നത്. ഇതിനായി നീക്കിവെക്കുന്ന 17.31 കോടി രൂപയാണ് 23.51 കോടിയായി സര്‍ക്കാര്‍ ഉയര്‍ത്തിയതെന്ന് മാതൃഭൂമി റിപ്പോര്‍ട്ട് ചെയ്തു. ഈ സ്കോഷര്‍ഷിപ്പുകളിൽ ഏറ്റവും പ്രധാനം സിഎച്ച് മുഹമ്മദ് കോയ സ്കോളര്‍ഷിപ്പാണ്. മുൻപ് ഈ സ്കോളര്‍ഷിപ്പ് 80:20 അനുപാതത്തിൽ നല്‍കിയിരുന്നപ്പോള്‍ ആറരക്കോടി രൂപ മുസ്ലീം വിഭാഗത്തിനും ഒന്നര കോടി രൂപ ക്രിസ്ത്യൻ വിഭാഗത്തിനും ലഭിച്ചിരുന്നു. എന്നാൽ ക്രിസ്ത്യൻ വിഭാഗത്തിനുള്ള ഫണ്ട് വര്‍ധിപ്പിക്കുമ്പോള്‍ മുസ്ലീം വിദ്യാര്‍ഥികള്‍ക്കുള്ള വിഹിതത്തിൽ കുറവുണ്ടാകാതിരിക്കാനാണ് തുക പത്തുകോടിയായി സര്‍ക്കാര്‍ ഉയര്‍ത്തിയത്. ഇതനുസരിച്ച് മുസ്ലീം വിദ്യാര്‍ഥികള്‍ക്ക് ആറരക്കോടി രൂപ തന്നെ ലഭിക്കും. ക്രൈസ്തവവിഭാഗത്തിനുള്ള വിഹിതം നാലരക്കോടിയായും ഉയരും.
Also Read:
2007ൽ എൽഡിഎഫ് സര്‍ക്കാര്‍ പാലോളി മുഹമ്മദ് കുട്ടി അധ്യക്ഷനായി നിയമിച്ച സമിതിയുടെ ശുപാര്‍ശയുടെ അടിസ്ഥാനത്തിലാണ് മുസ്ലീം വിഭാഗത്തിലെ വിദ്യാര്‍ഥികള്‍ക്ക് സ്കോളര്‍ഷിപ്പ് നല്‍കാൻ തീരുമാനിച്ചത്. സച്ചാര്‍ കമ്മീഷൻ റിപ്പോര്‍ട്ടിൻ്റെ അടിസ്ഥാനത്തിലായിരുന്നു സമിതിയുടെ റിപ്പോര്‍ട്ട്. മുസ്ലീം വിഭാഗത്തിലെ പെൺകുട്ടികള്‍ക്കാണ് മുൻഗണനയുള്ളത്. തുടര്‍ന്ന് 2011ൽ ഈ സ്കോളര്‍ഷിപ്പ് ക്രൈസ്തവ വിഭാഗങ്ങള്‍ക്കു കൂടി ലഭ്യമാക്കുകയായിരുന്നു. എന്നാൽ 20 ശതമാനം ക്രൈസ്തവര്‍ക്ക് എന്ന സര്‍ക്കാര്‍ തീരുമാനം ജനസംഖ്യാനുപാതികമല്ലെന്ന് ഈ വര്‍ഷം മെയിൽ കേരള ഹൈക്കോടതി വിധിക്കുകയായിരുന്നു.
Also Read:
2011ലെ കണക്കുകള്‍ പ്രകാരം ജനസംഖ്യാനുപാതത്തിൽ കേരളത്തിലെ ന്യൂനപക്ഷങ്ങളിൽ 26.56 ശതമാനം മുസ്ലീങ്ങളാണ്. 18.38 ശതമാനമാണ് ക്രിസ്ത്യൻ വിഭാഗം. ബുദ്ധ, ജൈന, സിഖ് മതക്കാര്‍ 0.01 ശതമാനം മാത്രമാണുള്ളത്.
നിലവിൽ മുസ്ലീം വിഭാഗത്തിലെ പിന്നോക്കാവസ്ഥയെക്കുറിച്ച് മാത്രമാണ് പഠിച്ചിട്ടുള്ളത്. ക്രൈസ്തവ വിഭാഗത്തിലെ പിന്നോക്കാവസ്ഥയെക്കുറിച്ച് പഠിക്കാൻ സര്‍ക്കാര്‍ ജെ ബി കോശി അധ്യക്ഷനായ സമിതിയെ നിയോഗിച്ചിട്ടുണ്ട്. ഈ സമിതിയുടെ റിപ്പോര്‍ട്ട് പുറത്തു വരുന്നതു വരെ പുതിയ രീതിയിൽ സ്കോളര്‍ഷിപ്പ് വിതരണൺ തുടരും. സമിതി നല്‍കുന്ന റിപ്പോര്‍ട്ടിലെ ശുപാര്‍ശ അനുസരിച്ച് ഇതിൽ മാറ്റം വരുത്തും.
