കോട്ടയം: മലങ്കര ഓർത്തഡോക്സ് സഭാപരമാധ്യക്ഷൻ ബസേലിയോസ് മാർത്തോമാ പൗലോസ് ദ്വിതീയൻ കാതോലിക്ക ബാവയുടെ സംസ്കാര ചടങ്ങുകൾ പൂർത്തിയായി. ഔദ്യോഗിക ബഹുമതികളോടെ കോട്ടയത്തെ ദേവലോകം അരമനയിലാണ് ചടങ്ങുകൾ നടന്നത്. അരമനയിലെ ചാപ്പലിനോടുചേർന്നുള്ള പരിശുദ്ധ കാതോലിക്കാ ബാവാമാരുടെ കബറിടത്തിനോടുചേർന്ന് ഭൗതികശരീരം സംസ്കരിച്ചു.
കോവിഡ് പ്രോട്ടോക്കോൾ പാലിച്ച് സാമൂഹിക സാംസ്കാരിക രംഗത്തെ നിരവധി പേരാണ് അദ്ദേഹത്തിന് അന്ത്യാഞ്ജലി അർപ്പിക്കാനെത്തിയത്. സഭയിലെ തന്നെ മുതിർന്ന മെത്രോപോലീത്ത ആയ കുര്യാക്കോസ് മാർ ക്ലിമ്മീസിന്റെ നേതൃത്വത്തിലാണ് ചടങ്ങുകൾ നടന്നത്.
പരിശുദ്ധ ബസേലിയോസ് മാർത്തോമ്മാ പൗലോസ് ദ്വിതീയൻ കാതോലിക്കാ ബാവ (75) തിങ്കളാഴ്ച പുലർച്ചെ 2.40ഓടെയാണ് പരുമലയിലെ സ്വകാര്യ ആശുപത്രിയിൽ കാലംചെയ്തത്. ബാവയുടെ ഭൗതികശരീരം രാവിലെ ആറുമണിയോടെ പരുമല പള്ളിയിലെത്തിച്ചു. മദ്ബഹയ്ക്കുമുൻപിൽ പൊതുദർശനത്തിനായി എംബാംചെയ്ത ശരീരം കണ്ണാടിക്കൂട്ടിലെ സിംഹാസനത്തിലിരുത്തി. രാവിലെമുതൽ വിശ്വാസികൾ ബാവയെ കാണാനായി പരുമലയിലേക്കൊഴുകിയെത്തിയിരുന്നു. പരുമലപ്പള്ളിയിലെ വിടവാങ്ങൽ പ്രാർഥനയ്ക്കുശേഷം തിങ്കാഴ്ച രാത്രി എട്ടുമണിയോടെയാണ് ഭൗതികശരീരം കോട്ടയം ദേവലോകം കാതോലിക്കേറ്റ് അരമനയിലേക്കു വിലാപയാത്രയായി എത്തിച്ചത്.
പൊതുദർശനത്തിന് ശേഷം ഉച്ചയ്ക്ക് മൂന്നുമണിയോടെ ചാപ്പലിലെ വിശുദ്ധ മദ്ഹബയിൽ ശുശ്രൂഷാ ചടങ്ങുകൾ ആരംഭിച്ചു. അഞ്ചരയോടെയാണ് സംസ്കാര ചടങ്ങുകൾ പൂർത്തിയായത്.
കാതോലിക്കാ ബാവയുടെ ദേഹവിയോഗത്തിൽ രാഷ്ട്രപതി രാംനാഥ് കോവിന്ദും പ്രധാനമന്ത്രി നരേന്ദ്രമോദിയും അനുശോചിച്ചിരുന്നു.
Content Highlights:Malankara Orthodox Syrian Church head Baselios Marthoma Paulose II Funeral
