കൊച്ചി: ജോലിക്കാർക്ക് മിനിമം വേജ് കൊടുക്കണ്ട എന്നതിന് ഞാൻ സ്റ്റേ വാങ്ങിയിട്ടുണ്ട് എന്ന് അഹങ്കരിക്കുന്ന ഒരു മുതലാളിയുടെ മുന്നിൽ പഞ്ചപുച്ഛമടക്കി നിൽക്കാൻ മനസ്സില്ലെന്ന് എംഎൽഎ. ഒരു ഇന്ത്യൻ പൗരൻ എന്ന നിലയിൽ ഭരണഘടന അനുശാസിക്കുന്ന നിയമവാഴ്ചയുടെ തലത്തെ ഭയപ്പെടുന്നത് സാബു എം ജേക്കബിന്റെ കാപട്യത്തിന്റെ പ്രത്യക്ഷമായ തെളിവാണെന്നും പിടി തോമസ് ഫേസ്ബുക്ക് പോസ്റ്റിൽ പറഞ്ഞു.
250 പേർ ജോലി ചെയ്യുന്ന സ്ഥാപനം നിയമാനുസൃതം പ്രവർത്തിക്കണം എന്ന് പറഞ്ഞാൽ 10000 പേരുടെ തൊഴിൽ കളയുന്ന ആളാണ് പി ടി തോമസ് എന്ന് ആർക്കെങ്കിലും പറയാൻ സാധിക്കുമോ.
ഞാൻ 100% ഇപ്പോഴത്തെ ജനങ്ങളെയും ഭാവി തലമുറയെയും കണ്ടുകൊണ്ട് സത്യസന്ധമായി ഉന്നയിച്ച ആരോപണങ്ങൾ ആണ്. അതിന്റെ പേരിൽ എത്ര ചീത്ത കേട്ടാലും എത്ര ആക്ഷേപം ഏറ്റുവാങ്ങേണ്ടി വന്നാലും നിലപാടിൽ ഞാൻ ഉറച്ചു നിൽക്കും.
വളരെ ഗുരുതരമായ രാസ മാലിന്യങ്ങൾ പുറന്തള്ളുന്ന ഒരു കമ്പനി അവിടെ റിവേഴ്സ് ഓസ്മോസിസ് സിസ്റ്റം സ്ഥാപിച്ച് ഇസഡ് എൽ ഡി സിസ്റ്റം നടപ്പാക്കണമെന്നുള്ളത് രാജ്യത്തെ നിയമമാണ്. അത് ചൂണ്ടി കാണിച്ചാൽ ആ നിയമം നടപ്പിലാക്കണം എന്ന് പറയാൻ നീ ആര് എന്ന് പണത്തിന്റെ അഹങ്കാരം കൊണ്ട് വെല്ലുവിളിച്ചാൽ എന്ത് സംഭവിച്ചാലും അത്തരം അഹങ്കാരങ്ങൾ ചോദ്യം ചെയ്തിരിക്കും- പിടി തോമസ് വ്യക്തമാക്കി.
