ബ്രസീലിയ> ഗോൾ കീപ്പർ എമിലിയാനോ മാർട്ടിനെസിന്റെ മിന്നുന്ന പ്രകടനം അർജന്റീനയെ കോപ അമേരിക്ക ഫുട്ബോൾ ഫൈനലിൽ എത്തിച്ചു. ഷൂട്ടൗട്ടിൽ കൊളംബിയയെ 3 ‐2ന് തകർത്താണ് അർജന്റീനയുടെ ഫൈനൽ പ്രവേശം. നിശ്ചിത സമയത്ത് ഫലം 1‐1 ആയിരുന്നു.
ഞായറാഴ്ച പുലർച്ചെ നടക്കുന്ന ഫൈനലിൽ നിലവിലെ ചാന്പ്യൻമാരായ ബ്രസീലുമായാണ് കിരീടപ്പോരാട്ടം. ആവേശകരമായ സെമി പോരിൽ അർജന്റീന ഗോൾ കീപ്പർ മാർട്ടിനെസ് കൊളംബിയയുടെ മൂന്ന് പെനൽറ്റി കിക്കുകളാണ് തടുത്തിട്ടത്.
അർജന്റീനയ്ക്കായി ലയണൽ മെസി,ലിയാൻഡ്രോ പരദേസ്, ലൗതാരോ മാർട്ടിനെസ് എന്നിവർ കിക്ക് ലക്ഷ്യത്തിലെത്തിച്ചു. റോഡ്രിഗോ ഡി പോളിന്റെ കിക്ക് ബാറിന് മുകളിലൂടെ പറന്നു.
കളിയുടെ തുടക്കത്തിൽതന്നെ അർജന്റീന ലൗതാരോ മാർട്ടിനെസിലൂടെ ലീഡ് നേടിയിരുന്നു. മെസിയാണ് അവസരമൊരുക്കിയത്. എന്നാൽ രണ്ടാം പകുതിയിൽ കൊളംബിയ തിരിച്ചടിച്ചു. ലൂയിസ് ഡയസ് കൊളംബിയക്കായി സമനില ഗോൾ നേടി. തുടർന്ന് മത്സരം ഷൂട്ടൗട്ടിലേക്ക് നീങ്ങുകയായിരുന്നു.
