കൊച്ചി: കസ്റ്റംസ് തന്നെ നഗ്നനാക്കി മർദ്ദിച്ചെന്ന പരാതിയുമായി സ്വർണ്ണക്കടത്ത് കേസ് പ്രതി . രണ്ടാം ദിവസമാണ് കസ്റ്റംസ് തന്നെ നഗ്നനാക്കി മർദ്ദിച്ചതെന്ന് അർജുൻ മൊഴി നൽകി.
ഓഫീസിൽ സിസിടിവി ഉണ്ടായിരുന്നില്ലേ എന്ന് കോടതി ചോദിച്ചു. തന്നെ കസ്റ്റംസ് സൂപ്രണ്ടിന്റെ മുറിയിൽ വെച്ചാണ് മർദ്ദിച്ചതെന്ന് അർജുൻ മൊഴി നൽകി. കോടതി മൊഴി രേഖപ്പെടുത്തിയിട്ടുണ്ട്. സാമ്പത്തിക കുറ്റകൃത്യങ്ങൾ കൈകാര്യം ചെയ്യുന്ന കൊച്ചിയിലെ കോടതിയിൽ ഹാജരാക്കിയപ്പോഴാണ് അർജുൻ പരാതി നൽകിയത്.
അർജുന്റെ ഏഴ് ദിവസത്തെ കസ്റ്റഡി കാലാവധി കഴിഞ്ഞിരുന്നു. അതേസമയം അർജുനെ ഏഴ് ദിവസം കൂടി കസ്റ്റംസ് കസ്റ്റഡിയിൽ ആവശ്യപ്പെട്ടു. കൂടുതൽ വിവരം ലഭിക്കാൻ അർജുനെ വീണ്ടും ചോദ്യം ചെയ്യേണ്ടതുണ്ടെന്നാണ് കസ്റ്റംസിന്റെ വാദം.
സമൂഹമാധ്യമങ്ങളിലൂടെ രാഷ്ട്രീയ പാർട്ടികളുടെ അനുഭാവിയാണെന്ന് സ്വയം പ്രഖ്യാപിച്ച് യുവാക്കളെ ആകർഷിക്കുന്നതാണ് അർജുന്റെ രീതിയെന്ന് കസ്റ്റംസ് പറയുന്നു. ഈ യുവാക്കളെയാണ് സാമൂഹ്യ വിരുദ്ധ പ്രവർത്തനങ്ങൾക്ക് ഉപയോഗിച്ചതെന്നും റിപ്പോർട്ടിൽ വ്യക്തമാക്കുന്നു.
