മുംബൈ > ഭരണകൂട ഭീകരതയ്ക്ക് ഇരയായി ജയിലിലും പിന്നീട് ആശുപത്രിയിലും കഴിയേണ്ടിവന്ന മനുഷ്യാവകാശ പ്രവര്ത്തകന് ഫാ.സ്റ്റാന് സ്വാമി (84) അന്തരിച്ചു. ബാന്ദ്രയിലെ ഹോളി ഫെയ്ത്ത് ആശുപത്രിയില് ചികിത്സയിലിരിക്കെയാണ് അന്ത്യം. എല്ഗാര് പരിഷത് കേസില് ജാമ്യാപേക്ഷ പരിഗണിക്കുന്നതിന് തൊട്ടുമുന്പാണ് മരണം സംഭവിച്ചത്. മരണം ഞെട്ടലുളവാക്കുന്നുവെന്ന് ബോംബെ ഹൈക്കോടതി പറഞ്ഞു. എന്നാല് സ്റ്റാന് സ്വാമിക്ക് ചികിത്സ നല്കാന് വൈകിയെന്ന് അഭിഭാഷകന് അറിയിച്ചു.
ആരോഗ്യനില വഷളായതിനെ തുടര്ന്ന് സ്റ്റാന് സ്വാമിയെ വെന്റിലേറ്ററില് പ്രവേശിപ്പിച്ചിരുന്നു. തുടര്ന്ന് ചികിത്സയ്ക്കിടെയാണ് അന്ത്യം. കടുത്ത ശ്വാസ തടസത്തേയും ഓക്സിജന് നിലയിലെ വ്യതിയാനത്തേയും തുടര്ന്നാണ് വെന്റിലേറ്ററിലേക്ക് മാറ്റിയത്. മെയ് 30 മുതല് ബാന്ദ്ര ഹോളി ഫാമിലി ആശുപത്രിയില് കോവിഡാനന്തര ചികില്സയിലായിരുന്നു അദ്ദേഹം.
കേസില് അറസ്റ്റിലായി തലോജ ജയിലില് കഴിയവേയാണ് സ്റ്റാന് സ്വാമിയുടെ ആരോഗ്യനില മോശമായത്. 2018 ജനുവരി 1ന് പുണെയിലെ ഭീമ കോറേഗാവില് നടന്ന എല്ഗര് പരിഷത്ത് സംഗമത്തില് മാവോയിസ്റ്റ് ബന്ധമാരോപിച്ചാണ് ഫാ. സ്റ്റാന് സ്വാമി ഉള്പ്പെടെയുള്ള മനുഷ്യാവകാശ പ്രവര്ത്തകരെ അറസ്റ്റുചെയ്തത്.
സര്ക്കാറുകള് ദളിതര്ക്കെതിരെ നടത്തിവരുന്ന ജനാധിപത്യ ധ്വംസനത്തിനെതിരെ പട നയിച്ച മനുഷ്യാവകാശ പ്രവര്ത്തകനായിരുന്നു സ്റ്റാന് സ്വാമി. അഞ്ച് ദശാബ്ദക്കാലമായി ഭൂമി അവകാശ, വനാവകാശ പോരാട്ടങ്ങളിലെ മുന്നണി പോരാളിയായിരുന്നു.
ഒക്ടോബര്മുതല് തലോജ ജയിലിലാണ് അദ്ദേഹം. പാര്ക്കിസന്സ് അടക്കമുള്ള രോഗങ്ങള് ബാധിച്ച ഫാ. സ്റ്റാന് പരസഹായമില്ലാതെ ഭക്ഷണം കഴിക്കാനോ നടക്കാനോ പോലും കഴിയാത്ത അവസ്ഥയിലായിരുന്നു. കോവിഡ് ഒന്നാം തരംഗകാലത്ത് റാഞ്ചിയിലെ വീട്ടില്നിന്ന് അദ്ദേഹത്തെ എന്ഐഎ അറസ്റ്റു ചെയ്ത് മഹാരാഷ്ട്രയില് എത്തിക്കുകയായിരുന്നു.
