കൊച്ചി > കോവിഡ് നിയന്ത്രണങ്ങളെ തുടർന്ന് ഓൺലൈൻ പണ ഇടപാടുകൾ കൂടിയതോടെ രാജ്യത്ത് ഡിജിറ്റൽ സാമ്പത്തിക തട്ടിപ്പുകളും കൂടുന്നു. 2020 ലെ അവസാന നാല് മാസങ്ങളെ അപേക്ഷിച്ച് ഈ വർഷം മെയ് മാസം വരെ ഡിജിറ്റൽ തട്ടിപ്പ് ശ്രമങ്ങളിൽ 88 ശതമാനം വർധനയുണ്ടായെന്ന് ധനകാര്യ സേവന മേഖലയിൽ പ്രവർത്തിക്കുന്ന ട്രാൻസ് യൂണിയൻ നടത്തിയ പഠനത്തിൽ പറയുന്നു.
ആഗോള തലത്തിൽ സാമ്പത്തിക സേവന തട്ടിപ്പിൽ 149 ശതമാനമാണ് വർധന. രാജ്യത്തെ ടെലികോം മേഖലയിൽ 18.54 ശതമാനവും യാത്രാ മേഖലയിൽ 11.57 ശതമാനവും തട്ടിപ്പ് ശ്രമങ്ങൾ വർധിച്ചു. ആഗോള തലത്തിൽ 40,000 വെബ്സൈറ്റുകളിലും ആപ്പുകളിലും നടന്ന കോടിക്കണക്കിന് ഇടപാടുകൾ വികശലനം ചെയ്താണ് ഈ പഠന റിപ്പോർട്ട് തയ്യാറാക്കിയതെന്നും ഉയർന്ന മൂല്യമുള്ള ഇടപാടുകൾ നടക്കുന്ന സാമ്പത്തിക സേവന മേഖലയിലാണ് ഡിജിറ്റൽ തട്ടിപ്പ് കൂടുതലും നടക്കുന്നതെന്നും ട്രാൻസ് യൂണിയൻ ഇന്ത്യയുടെ എക്സിക്യൂട്ടീവ് വൈസ് പ്രസിഡൻറ് ഷലീൻ ശ്രീവാസ്തവ പറഞ്ഞു.
രഹസ്യ വിവരങ്ങൾ ചോർത്തുന്ന സോഫ്റ്റ്വെയറുകൾ, അപരിചിതവും സുരക്ഷിതമല്ലാത്തതുമായ ലിങ്കുകളിലൂടെയുള്ള ബാങ്ക് ഇടപാടുകൾ, വിശ്വാസ്യതയില്ലാത്ത ഓൺലൈൻ ഷോപ്പിങ് സൈറ്റുകൾ തുടങ്ങിയവയിലൂടെയാണ് ഡിജിറ്റിൽ സാമ്പത്തിക തട്ടിപ്പുകൾ അധികവും നടക്കുന്നത്. ഒടിപി, പാസ് വേർഡ്, പിൻ നമ്പർ തുടങ്ങിയവപങ്കുവെയ്ക്കുന്നതിലൂടെയുള്ള തട്ടിപ്പും വർധിച്ചിട്ടുണ്ട്.
