കോവിഡ് കേസുകളില്ലാത്ത ഇടമലക്കുടിയില്‍ യുട്യൂബ് ചാനല്‍ ഉടമയുമായി യാത്ര; ഇടുക്കി എം.പി. വിവാദത്തില്‍

മൂന്നാർ: സംസ്ഥാനത്ത് കോവിഡ് കേസുകളില്ലാത്ത ഒരേയൊരു പഞ്ചായത്തായ ഇടമലക്കുടിയിലേക്ക് സ്വകാര്യ യുട്യൂബ് ചാനൽ ഉടമയെ കൊണ്ടുപോയ ഡീൻ കുര്യാക്കോസ് എം.പിയുടെ നടപടി വിവാദമായി. അനാവശ്യമായി പുറത്തുനിന്ന് ആളെ കൊണ്ടുവന്നതുവഴി കുടിയിൽ രോഗവ്യാപനമുണ്ടാകുമെന്ന ആരോപണമാണ് പ്രധാനമായും ഉയരുന്നത്.

ഇതുകൂടാതെ സംരക്ഷിത വനമേഖലയ്ക്കുള്ളിൽ കടന്ന് വനത്തിന്റെയും ആദിവാസികളുടെയും ദൃശ്യങ്ങൾ ചിത്രീകരിച്ച യുട്യൂബ് ചാനൽ ഉടമ സുജിത് ഭക്തൻ, ഇയാളെ കുടിയിലെത്തിച്ച ഡീൻ കുര്യാക്കോസ് എം.പി. എന്നിവർക്കെതിരേ എ.ഐ.വൈ.എഫ്. പോലീസിൽ പരാതി നൽകി. ദേവികുളം മണ്ഡലം പ്രസിഡന്റ് എൻ.വിമൽരാജാണ് മൂന്നാർ ഡിവൈ.എസ്.പി, സബ്കളക്ടർ എന്നിവർക്ക് പരാതി നൽകിയത്. സി.പി.എം. ജില്ലാ സെക്രട്ടറി കെ.കെ.ജയചന്ദ്രനും എം.പിക്കെതിരേ രംഗത്തുവന്നു.

സമ്പൂർണ ലോക്ഡൗൺ ദിവസമായ ഞായറാഴ്ചയാണ് എം.പിയും സംഘവും ഇടമലക്കുടിയിൽ പോയത്. ഇടമലക്കുടി ട്രൈബൽ ഗവ. സ്കൂളിന്റെ നവീകരണ പ്രവർത്തനങ്ങളുടെ ഉദ്ഘാടനമായിരുന്നു എന്നാണ് പറയുന്നത്. എം.പിക്കൊപ്പം യുട്യൂബറുമുണ്ടായിരുന്നു. സ്കൂളിലെ ഓൺലൈൻ പഠനത്തിനായി ടി.വി. നൽകാനെന്ന പേരിലാണ് യുട്യൂബർ സംഘത്തിനൊപ്പം വന്നത്. യുട്യൂബർ സമൂഹ മാധ്യമങ്ങളിലൂടെ ചിത്രങ്ങൾ പങ്കുവെച്ചപ്പോഴാണ് സംഭവം പുറംലോകം അറിയുന്നത്.

ഡീൻ കുര്യാക്കോസ് എം.പിയും സംഘവും ഇടമലക്കുടിയിൽ സന്ദർശനം നടത്തുന്നു. യുട്യൂബ് ചാനൽ ഉടമ ഫെയ്സ്ബുക്കിൽ പങ്കുവെച്ച ചിത്രം

അവധി ദിവസം ഇങ്ങനൊരു പരിപാടി ആരുമറിയാതെ നടത്തിയതിൽ ദുരൂഹതയുണ്ടെന്നാണ് ആരോപണം. യുട്യൂബറിന്റെ കച്ചവട താത്പര്യത്തിനായി സംരക്ഷിത വനമേഖലയുടെയും ഗോത്രവർഗ സമൂഹത്തിന്റെയും ദൃശ്യങ്ങൾ പകർത്താൻ എം.പി. വഴിയൊരുക്കുകയായിരുന്നെന്നും ആക്ഷേപം ഉണ്ട്. നിരോധിത വനമേഖഖലയിൽ കടന്നുകയറി ചിത്രീകരണം നടത്തിയതിന് യുട്യൂബർക്കെതിരേ നേരത്തെയും കേസുണ്ട്.

എം.പി.യുൾപ്പെടെയുള്ളവർക്കെതിരേ കേസെടുക്കണമെന്ന് സി.പി.എം. ജില്ലാ സെക്രട്ടറി കെ.കെ.ജയചന്ദ്രൻ ആവശ്യപ്പെട്ടു. സംസ്ഥാനത്തെ ആദ്യ ഗോത്രവർഗ പഞ്ചായത്തായ ഇടമലക്കുടിയിൽ ഇതുവരെയും കോവിഡ് റിപ്പോർട്ട് ചെയ്തിട്ടില്ല. കോവിഡ് തുടങ്ങിയപ്പോൾ തന്നെ പുറത്തുനിന്നുള്ള ആളുകളെ പ്രവേശിപ്പിക്കാതെ കർശന നിയന്ത്രണങ്ങളാണ് പഞ്ചായത്ത് കൈക്കൊണ്ടത്.

ആരോപണങ്ങൾരാഷ്ട്രീയ പ്രേരിതം

ട്രൈബൽ സ്കൂളിന്റെ നിർമാണോദ്ഘാടനത്തിനാണ് പോയത്. സ്കൂളിലേക്ക് ആവശ്യമുള്ള ടി.വി. നൽകിയത് സുഹൃത്തായ യു ട്യൂബ് ഉടമയാണ്. താൻ ക്ഷണിച്ച പ്രകാരമാണ് അയാൾ ഇടമലക്കുടിയിലെത്തിയത്. മറിച്ചുള്ള ആരോപണങ്ങൾ രാഷ്ട്രീയ പ്രേരിതമാണ്.

-ഡീൻ കുര്യാക്കോസ് എം.പി.

Content Highlights:Controversy On Dean Kuriakose MP Edamalakkudy Journey With Youtuber