കൊച്ചി: കരിപ്പൂർ സ്വർണ്ണ കള്ളക്കടത്ത് കേസിൽ നിർണ്ണായക പങ്കുണ്ടെന്ന് സംശയിക്കുന്ന അർജ്ജുൻ ആയങ്കി അറസ്റ്റിൽ. കൊച്ചി കസ്റ്റംസാണ് ഇയാളെ അറസ്റ്റ് ചെയ്തത്. മണിക്കൂറുകളോളം നീണ്ട ചോദ്യം ചെയ്യലിനൊടുവിൽ വൈകുന്നേരത്തോടെയാണ് അറസ്റ്റ് രേഖപ്പെടുത്തിയത്.
കേസിൽ ഇന്നു രാവിലെ അർജുൻ ചോദ്യം ചെയ്യലിന് ഹാജരായിരുന്നു. കൊച്ചിയിലെ കസ്റ്റംസ് പ്രിവന്റീവ് ഓഫീസിലാണ് ഹാജരായത്. അഭിഭാഷകർക്കൊപ്പം എത്തിയ അർജുനെ കസ്റ്റംസ് കസ്റ്റഡിയിലെടുക്കുകയായിരുന്നു.
Also Read:
രാമനാട്ടുകരയിൽ വാഹനാപകടത്തിൽ അഞ്ച് പേർ കൊല്ലപ്പെട്ട സംഭവത്തിൽ നടത്തിയ അന്വേഷണത്തിലാണ് സ്വർണ്ണക്കടത്ത് സംഘത്തെക്കുറിച്ചുള്ള നിർണ്ണായക വിവരം ലഭിച്ചത്.
സ്വർണ്ണക്കടത്ത് കേസിൽ ആദ്യം അറസ്റ്റിലായ മുഹമ്മദ് ഷഫീഖ് കൊണ്ടുവന്ന സ്വർണ്ണത്തിൽ രണ്ടര കിലോ അർജുനുവേണ്ടിയുള്ളതാണെന്ന് മൊഴി നൽകിയിരുന്നു. ഇതിന്റെ അടിസ്ഥാനത്തിലാണ് അർജുനോട് ചോദ്യം ചെയ്യലിന് ഹാജരാകാൻ കസ്റ്റംസ് നിർദ്ദേശിച്ചത്.
കരിപ്പൂർ വിമാനത്താവളത്തിലൂടെ സ്വർണ്ണം കടത്താനും തട്ടിയെടുക്കാനും നിരവധി സംഘങ്ങൾ എത്തിയിരുന്നുവെന്നാണ് റിപ്പോർട്ട്. കടത്തിക്കൊണ്ടുവന്ന സ്വർണ്ണം പിടിക്കപ്പെട്ടതോടെയാണ് സംഭവം വെളിച്ചത്തായത്.
