‘പിണറായി നേരിട്ട് കള്ളപ്പണം വിതരണം ചെയ്‌തു, ഘടകകക്ഷികൾക്കും പണം ലഭിച്ചു’: അബ്‌ദുള്ളക്കുട്ടി

കണ്ണൂർ: മുഖ്യമന്ത്രി കള്ളപ്പണം വിതരണം ചെയ്‌തെന്ന് ബിജെപി ദേശീയ ഉപാധ്യക്ഷൻ . കഴിഞ്ഞ നിയമസഭാ തെരഞ്ഞെടുപ്പ് കാലത്താണ് സിപിഎമ്മിൻ്റെ നേതൃത്വത്തിൽ കള്ളപ്പണം വിതരണം ചെയ്‌തത്. മുഖ്യമന്ത്രി നേരിട്ട് ഇടപെട്ടാണ് ഇടപാട് നടത്തിയതെന്നും അദ്ദേഹം ആരോപിച്ചു.

ഘടകകക്ഷികൾ അടക്കമുള്ളവർക്കാണ് കള്ളപ്പണം വിതരണം ചെയ്‌തത്. മുഖ്യമന്ത്രിയാണ് ഈ പണം കൈമാറിയത്. നിയമസഭാ തെരഞ്ഞെടുപ്പിൽ ഇടതുമുന്നണിയുടെ വിജയത്തിന് കാരണം കിറ്റല്ല. കള്ളപ്പണമാണ് അവരുടെ വിജയത്തിന് കാരണമായത്. നിലവിലെ കേസ് നടപടികളെ നിയമപരമായി നേരിടുമെന്നും അബ്‌ദുള്ളക്കുട്ടി ആരോപിച്ചു.

ബിജെപി നേതാക്കളെ സംസ്ഥാന സർക്കാർ വേട്ടയാടുകയാണെന്നും പ്രതിഷേധ പരിപാടി ഉദ്ഘാടനം ചെയ്‌ത് സംസാരിക്കവെ അബ്‌ദുള്ളക്കുട്ടി വ്യക്തമാക്കി. ബിജെപി സംസ്ഥാന അധ്യക്ഷൻ കെ സുരേന്ദ്രനടക്കമുള്ള ബിജെപി നേതാക്കളെ പ്രതിരോധത്തിലാക്കിയ കൊടകര കുഴൽപ്പണ കേസിൽ പോലീസ് അന്വേഷണം തുടരുന്ന സാഹചര്യത്തിലാണ് ബിജെപി പ്രതിഷേധ പരിപാടി ആരംഭിച്ചത്. സംസ്ഥാന സർക്കാർ വേട്ടയാടുകയാണെന്നാണ് ബിജെപി നേതൃത്വത്തിൻ്റെ വാദം.

ബിജെപി നേതാക്കളെ കള്ളക്കേസിൽ കുടുക്കുകയാണെന്നും ഇതിനായി ആസൂത്രിത നീക്കം നടക്കുന്നുണ്ടെന്നും ബിജെപി ആരോപിച്ചു. രണ്ടാം വരവിൽ പിണറായി വിജയൻ ബിജെപിക്കെതിരെ പ്രതികാരം തീർക്കുകയാണെന്ന് കെ സുരേന്ദ്രൻ ആരോപിച്ചു. കൊടകര കവർച്ച കേസുകളിലടക്കം പിണറായി വിജയൻ സർക്കാർ രാഷ്‌ട്രീയ വൈരം തീർക്കാൻ പോലീസിനെ ഉപയോഗിക്കുകയാണെന്നും അദ്ദേഹം ആരോപിച്ചു.