കോണ്‍ഗ്രസിന്‍റെ പുനസംഘടനയെക്കുറിച്ചുള്ള ചോദ്യത്തോട് പ്രതികരിക്കവെയാണ് നിയുക്ത കെപിസിസി അധ്യക്ഷൻ നിലപാട് വ്യക്തമാക്കിയത്. ‘കഴിവും പ്രാപ്തിയും വിശ്വാസ്യതയും സമര്‍പ്പണവും ഒക്കെ വെച്ച് കൊള്ളാവുന്നവരെ നിലനിര്‍ത്തും. കൊള്ളാത്തവരെ മാറ്റും. ഐ, എ ഗ്രൂപ്പുകള്‍ ലിസ്റ്റ് തരുന്ന കാലമൊക്കെ കഴിഞ്ഞിട്ടുണ്ട്. അങ്ങനെയൊരു ലിസ്റ്റ് ഇനിയില്ല’ സുധാകരൻ റിപ്പോർട്ടർ ചാനലിനോട് പറഞ്ഞു.
തനിക്ക് ഗ്രൂപ്പില്ലെന്നും ഗ്രൂപ്പുകൾക്ക് അതീതമായി പ്രവർത്തിച്ച വ്യക്തിയാണ് താനെന്നും പറഞ്ഞ സുധാകരൻ അത് ഇനിയും തുടരുമെന്നും കൂട്ടിച്ചേർത്തു. തന്‍റെ കൂട്ടത്തിൽ എല്ലാ ഗ്രൂപ്പുകാരുമുണ്ട്. എല്ലാവരെയും സമഭാവനയോടെയാണ് കാണുന്ന വ്യക്തിയാണ് ഞാന്‍. ഗ്രൂപ്പ് രഹിതനായി തുടങ്ങിയതാണ് താനെന്നും അദ്ദേഹം കൂട്ടിച്ചേർത്തു.
കഴിഞ്ഞദിവസം മുൻ കെപിസിസി അധ്യക്ഷനും പ്രതിപക്ഷ നേതാവുമായിരുന്ന രമേശ് ചെന്നിത്തലയെ കെ സുധാകരൻ സന്ദർശിച്ചിരുന്നു. തിരുവനന്തപുരത്തെ വീട്ടിലെത്തിയാണ് കെ സുധാകരൻ ചെന്നിത്തലയുമായി കൂടികാഴ്ച്ച നടത്തിയത്.
Also Read :
കെപിസിസി പ്രസിഡന്റ്, പ്രതിപക്ഷ നേതാവ് എന്നി നിലകളിലെല്ലാം വളരെ മികച്ച പ്രവർത്തനം നടത്തിയ ചരിത്രമാണ് രമേശ് ചെന്നിത്തലക്ക് ഉള്ളതെന്ന് സന്ദർശനത്തിന് പിന്നാലെ കെ സുധാകരൻ പറഞ്ഞിരുന്നു. ‘പ്രതിസന്ധി ഘട്ടത്തിൽ പാർട്ടിയെ മുന്നോട്ട് നയിച്ച കെപിസിസി പ്രസിഡന്റ് ആയിരുന്നു രമേശ് ചെന്നിത്തല, വീണ്ടും പാർട്ടി പ്രതിസന്ധിയെ നേരിടുന്ന ഈ കാലത്ത് എന്‍റെ മുന്നോട്ടുള്ള പ്രയാണത്തിന് എല്ലാവിധ പിന്തുണയും അദ്ദേഹം വാഗ്ദാനം ചെയ്തെന്നും’ സുധാകരൻ പറഞ്ഞിരുന്നു.
