തിരുവനന്തപുരം: മാംഗോ മൊബൈൽ എന്ന എം ഫോൺ ഉദ്ഘാടനം ചെയ്തെന്ന പിടി തോമസിന്റെ ആരോപണത്തിൽ പ്രതികരണവുമായി മുഖ്യമന്ത്രി. സഭയിൽ തെറ്റിദ്ധരിപ്പിക്കുന്ന പ്രസ്താവന നടത്തിയ പിടി തോമസ് സഭയിൽ മാപ്പ് പറയണമെന്ന് മുഖ്യമന്ത്രി ആവശ്യപ്പെട്ടു.
2016 ഫെബ്രുവരിയിലാണ് മാംഗോ കേസ് പ്രതികൾ അറസ്റ്റിലാകുന്നത്. അന്ന് ഉമ്മൻ ചാണ്ടിയായിരുന്നു മുഖ്യമന്ത്രി. പിടി തോമസ് സഭയെ തെറ്റിദ്ധരിപ്പിക്കുകയാണെന്ന് മുഖ്യമന്ത്രി പറഞ്ഞു.
കൊച്ചിയിൽ നടന്ന മാംഗോ മൊബൈൽ ഉദ്ഘാടനത്തിൽ മുഖ്യമന്ത്രി പിണറായി വിജയനെ ക്ഷണിച്ചെന്നായിരുന്നു പിടി തോമസിന്റെ ആരോപണം. മുട്ടിൽ വനം കൊള്ളയുമായി ബന്ധപ്പെട്ട അടിയന്തര പ്രമേയ നോട്ടീസിന്റെ അവതരണത്തിനിടെയായിരുന്നു പിടി തോമസിന്റെ പരാമർശം.
മാംഗോ മൊബൈലുമായി ബന്ധപ്പെട്ട വെബ്സൈറ്റിന്റെ ഉദ്ഘാടകനായി നിശ്ചയിച്ചിരുന്നത് മുഖ്യമന്ത്രിയെയാണ്. ചടങ്ങ് നടക്കുന്നതിനു തൊട്ടു മുമ്പ് പ്രതികളെ വേദിയിൽ വെച്ച് പോലീസ് അറസ്റ്റ് ചെയ്തതായി കേട്ടിരുന്നു. അതിനാൽ മുഖ്യമന്ത്രിക്ക് ചടങ്ങ് ഉദ്ഘാടനം ചെയ്യേണ്ടിവന്നില്ല. വനംകൊള്ളക്കാരുടെ തട്ടിപ്പിന്റെ ആഴവും പരപ്പും വ്യക്തമല്ലേ എന്നായിരുന്നു പിടി തോമസിന്റെ ചോദ്യം.
