കോഴിക്കോട്: കൊവിഡിനു പിന്നാലെ പടർന്നു പിടിക്കുന്ന രോഗത്തെ അടിസ്ഥാനമാക്കി പ്രചരിക്കുന്ന വ്യാജ വാർത്തകൾക്കെതിരെ കോഴിക്കോട് ജില്ലാ കളക്ടർ. ‘ഉള്ളികളിലെ ഫംഗസ് ബ്ലാക്ക് ഫംഗസിന് കാരണമാകും’ എന്നുള്ള പ്രചാരണത്തെ തള്ളിയാണ് കളക്ടർ രംഗത്തെത്തിയിരിക്കുന്നത്. വ്യാജ വാർത്ത പ്രചരിപ്പിച്ചാൽ നിയമ നടപടി സ്വീകരിക്കുമെന്നാണ് കളക്ടറുടെ മുന്നറിയിപ്പ്.
ദിലീഷ് പോത്തൻ സംവാധാനം ചെയ്ത ‘ജോജി” എന്ന സിനിമയിലെ സംഭാഷണം കടമെടുത്താണ് കളക്ടർ മുന്നറിയിപ്പ് നൽകിയിരിക്കുന്നത്.
“കൊവിഡിന്റെ മോശം സമയത്തും ജനങ്ങളിൽ ഭീതി പടർത്തുന്ന പല വ്യാജ വാർത്തകളും എയറിലുണ്ട്. അത്തരം വാർത്തകൾ തൊടുത്തു വിടുന്നവരെ നിയമപരമായി നേരിടും. അത് ക്ലബ്ബ് ഹൗസിലിരുന്ന് കുശുകുശുക്കുന്നവരാണെങ്കിലും, മറ്റ് സമൂഹ മാധ്യമങ്ങളിലൂടെ പരത്തുന്നവരായാലും ശരി…”
പുതിയ സോഷ്യൽ മീഡിയ ആപ്പായ ക്ലബ്ബ് ഹൗസിൽ അടക്കം ബ്ലാക്ക് ഫംഗസിനെക്കുറിച്ച് വ്യാജ വാ‍ര്‍ത്ത പ്രചരിക്കുന്നുണ്ടെന്നാണ് കളക്ടറുടെ ആരോപണം. കളക്ടറുടെ പോസ്റ്റിന് വലിയ പിന്തുണയാണ് സമൂഹ മാധ്യമങ്ങളിൽ ലഭിക്കുന്നത്.
