തിരുവനന്തപുരം: ദേവികുളം എംഎൽഎ നാളെ വീണ്ടും സത്യപ്രതിജ്ഞ ചെയ്യും. സ്പീക്കറുടെ ചേംബറിൽ രാവിലെ 8.30 നാണ് സത്യപ്രതിജ്ഞ. രാജയുടെ സത്യപ്രതിജ്ഞയിൽ അപാകതയുണ്ടെന്ന് ആക്ഷേപം ഉയർന്നിരുന്നു.
ആദ്യ സത്യപ്രതിജ്ഞയിൽ സഗൗരവമെന്നോ ദൈവനാമത്തിലെന്നോ പറഞ്ഞിരുന്നില്ല. നിയമ വകുപ്പ് ത‍ര്‍ജമ ചെയ്തപ്പോഴുണ്ടായ പിഴവാണ് ഇതെന്നാണ് വിലയിരുത്തൽ. നിയമോപദേശത്തിന്റെ പശ്ചാത്തലത്തിലാണ് രാജയോട് വീണ്ടും സത്യപ്രതിജ്ഞ ചെയ്യാൻ സ്പീക്ക‍ര്‍ ആവശ്യപ്പെട്ടത്.
കന്നഡ, തമിഴ് ഉൾപ്പെടെ നാല് ഭാഷകളിലാണ് പതിനഞ്ചാം നിയമസഭയിലെ എംഎൽഎമാ‍ര്‍ സത്യപ്രതിജ്ഞ ചെയ്തത്. 43 പേ‍ര്‍ ദൈവനാമത്തിലും 13 പേ‍ര്‍ അള്ളാഹുവിന്റെ നാമത്തിലും സത്യപ്രതിജ്ഞ ചെയ്തു. മഞ്ചേശ്വരത്തു നിന്നുള്ള കെഎം അഷ്റഫ് എംഎൽഎ കന്നഡയിലാണ് സത്യപ്രതിജ്ഞ ചെയ്തത്. പാലാ എംഎൽഎ മാണി സി കാപ്പനും മൂവാറ്റുപുഴ എംഎൽഎ മാത്യു കുഴൽനാടനും ഇംഗ്ലീഷിലാണ് സത്യപ്രതിജ്ഞ ചെയ്തത്.
