കോട്ടയം പ്രതിപക്ഷ നേതൃസ്ഥാനത്തുനിന്ന് ചെന്നിത്തലയെ മാറ്റിയ വിഷയത്തിൽ ഇനി പ്രതികരിക്കാനില്ലെന്നി ഉമ്മൻചാണ്ടി. പുതിയ പ്രതിപക്ഷ നേതാവിനെ തിരഞ്ഞെടുത്ത എഐസിസി തീരുമാനം എല്ലാവരും അംഗീകരിച്ചതാണ്. ഇനി പിന്നോട്ടുപോയി ഇക്കാര്യത്തിൽ അഭിപ്രായം പറയാനില്ലെന്നും ഉമ്മൻചാണ്ടി വ്യക്തമാക്കി.
കേന്ദ്രനേതൃത്വത്തിന് ചെന്നിത്തല അയച്ച കത്തിൽ തനിക്കെതിരേ വിമർശനമുണ്ടെന്ന വാർത്തയും ഉമ്മൻചാണ്ടി തള്ളി. ചെന്നിത്തല അത്തരമൊരു വിമർശനം ഉന്നയിക്കാൻ സാധ്യതയില്ലെന്നാണ് വിശ്വാസമെന്ന് ഉമ്മൻചാണ്ടി പ്രതികരിച്ചു. എല്ലാകാര്യങ്ങളും നേരിട്ട് അറിയാവുന്ന ആളാണ് ചെന്നിത്തലയെന്നും അദ്ദേഹം വ്യക്തമാക്കി.
ഘടകകക്ഷികളുടെ തെറ്റിദ്ധാരണ നീക്കാനാവശ്യമായ എല്ലാ കാര്യങ്ങളും ചെയ്യുമെന്നും ഉമ്മൻചാണ്ടി പറഞ്ഞു. ഷിബു ബേബി ജോൺ മുന്നണിക്കെതിരേ ആക്ഷേപം ഉയർത്തിയത് സംബന്ധിച്ച ചോദ്യത്തോട് പ്രതികരിക്കുകയായിരുന്നു അദ്ദേഹം. കോൺഗ്രസ് എന്നും ഘടകകക്ഷികളെ വിശ്വാസത്തിലെടുത്താണ് മുന്നോട്ടുപോയിട്ടുള്ളത്. ആക്ഷേപങ്ങൾ പരിശോധിക്കുമെന്നും അദ്ദേഹം വ്യക്തമാക്കി.
