“പാർട്ടി ഏൽപ്പിച്ച ഒരു ചുമതലയുമായിട്ടാണ് ഞാൻ അവിടേക്ക് പോയത്. നാളെ ഒരു ആവശ്യത്തിന് വിളിച്ചാൽ ഞാൻ വരുന്നതിന് തടസമില്ലെന്ന് അദ്ദേഹം പറഞ്ഞാൽ നാളെയും അവിടേക്ക് പോകും. എൻഎസ്എസിനെതിരെ പ്രതികൂലമായി ഒന്നും പറഞ്ഞിട്ടില്ല. എന്നാൽ അടുത്തയിടെ എൻഎസ്എസിനെതിരെ അനുകൂലമായി പറഞ്ഞിരുന്നു. ഇന്ത്യയിൽ സംഘപരിവാർ ശക്തികൾക്ക് വിലയ്ക്കെടുക്കാൻ കഴിയാത്ത ഹിന്ദു സംഘടനയാണ് എൻഎസ്എസ്. അവരുടെ മതിൽക്കെട്ടിനകത്തേക്ക് സംഘപരിവാർ ശക്തികളെ അവർ കയറ്റിയിട്ടില്ല. അക്കാര്യത്തിൽ ഇതുവരെ ഒരു സെക്യുലർ നിലപാടാണ് അവർ സ്വീകരിച്ചിട്ടുള്ളത്. അതാണ് എൻഎസ്എസിനെക്കുറിച്ച് നടത്തിയ പരാമർശം. സമുദായ സംഘടനകളെക്കുറിച്ച് പൊതുവായാണ് പറഞ്ഞിട്ടുള്ളത്. അതാണ് എന്റെ നിലപാട്.” സതീശൻ പറഞ്ഞതായി റിപ്പോർട്ടർ ലൈവ് റിപ്പോർട്ട് ചെയ്തു.
കെപിസിസിയുടെ നിലപാട് അറിയണമെങ്കിൽ അത് കെപിസിസി അധ്യക്ഷൻ പറയും. അതെനിക്ക് പറയാനാകില്ല. കോൺഗ്രസിന്റെ ആഭ്യന്തര പ്രശ്നങ്ങളിൽ ഇടപെടാൻ സമുദായ സംഘടനകളെ അനുവദിക്കാറില്ല. അങ്ങനെ ഇടപെടുന്ന സാഹചര്യം വന്നാൽ അപ്പോൾ ഇടപെട്ടാൽ മതിയല്ലോ. അതിനെക്കുറിച്ച് ഇപ്പോൾ പറയേണ്ടതില്ലല്ലോ- പറഞ്ഞു.
പ്രതിപക്ഷത്തിന്റെ പ്രവർത്തനങ്ങളെക്കുറിച്ച് ഏത് സമുദായ സംഘടനകൾക്കും അഭിപ്രായം പറയാം. സംഘടനകൾക്കും സ്ഥാപനങ്ങൾക്കും വിമർശിക്കാം. ഞങ്ങളുടെ ഭാഗത്ത് തെറ്റു പറ്റിയാൽ ഞങ്ങളെ കറക്ട് ചെയ്യാം. അവരുടെ ഭാഗത്താണ് തെറ്റെങ്കിൽ അതവരെ ബോധ്യപ്പെടുത്താൻ ശ്രമിക്കും. അഭിപ്രായ സ്വാതന്ത്ര്യമുള്ള നാടാണിത്, വിഡി സതീശൻ വ്യക്തമാക്കി.
