“ടെസ്റ്റ് പോസിറ്റിവിറ്റി നിരക്ക് കൂടി നിൽക്കുന്ന പ്രദേശമാണ് മലപ്പുറം. അവിടെ രോഗ വ്യാപനം കുറയുന്നില്ല. അതിന്റെ ഭാഗമായി പോലീസ് നടപടികൾ കൂടുതൽ ക‍ര്‍ക്കശമാക്കണമെന്ന് സ‍ര്‍ക്കാര്‍ തീരുമാനിച്ചിട്ടുണ്ട്. അതിന്റെ ഭാഗമായി പോലീസ് നടപടി ക‍ര്‍ക്കശമാക്കുന്നുണ്ടാകും. അതിന്റെ അ‍ര്‍ത്ഥം ആളുകളെ തല്ലുക എന്നല്ല. എന്നാൽ പോലീസ് ശക്തമായി ഇടപെടുന്ന സ്ഥിതിയുണ്ടാകും. കേസുകളുടെ എണ്ണം കൂടുന്ന നില വരും. പുറത്തിറങ്ങാൻ സമ്മതിച്ചില്ലെന്ന് വരും. അത്തരം കാര്യങ്ങൾ സ്വാഭാവികമായും സംഭവിക്കും. അത്തരം കാര്യങ്ങൾക്കിടയിൽ സംഭവിക്കാൻ പാടില്ലാത്തത് സംഭവിച്ചാൽ അത് പരിശോധിക്കുകയും ചെയ്യും.”
താലൂക്ക് ഓഫീസ് ജീവനക്കാരിയായ ഭാര്യയെ ഓഫീസിൽ എത്തിക്കാനായി പുറത്തിറങ്ങിയ ആളെ പരപ്പനങ്ങാടി സിഐ ഹണി കെ ദാസ് മർദ്ദിച്ചിരുന്നു. അയ്യപ്പൻകാവ് സ്വദേശി മാളിയിൽ പ്രമോദിനാണ് മർദ്ദനമേറ്റത്. ഞായറാഴ്ച രാവിലെ പരപ്പനങ്ങാടി അയ്യപ്പൻകാവിലായിരുന്നു സംഭവം. പ്രമോദിന്റെ ഭാര്യ
ലേഖ തിരൂരങ്ങാടി താലൂക്ക് ഓഫീസിലെ ജീവനക്കാരിയാണ്. കൊവിഡ് പ്രതിരോധ പ്രവർത്തനങ്ങളുടെ ഭാഗമായി ലേഖയ്ക്ക് ഞായറാഴ്ചയും ഓഫീസിൽ എത്തേണ്ടിയിരുന്നു. ഭാര്യയെ സർക്കാർ വാഹനത്തിൽ കയറ്റിവിട്ട് തിരികെ പോരുമ്പോഴാണ് പ്രമോദിന് മർദ്ദനമേറ്റത്.
വാണിയമ്പലത്താണ് രണ്ടാമത്തെ സംഭവം നടന്നത്. വണ്ടൂർ ചെട്ടിയാറ സ്വദേശി ബാദുഷയെ പോലീസ് ഏറെ നേരം നീണ്ട മൽപ്പിടുത്തത്തിനൊടുവിലാണ് കസ്റ്റഡിയിലെടുത്തത്. മീൻ വാങ്ങാനിറങ്ങിയതായിരുന്നു യുവാവ്. വാഹനത്തിന് മതിയായ രേഖകളില്ലെന്ന് ചൂണ്ടിക്കാട്ടി ബൈക്ക് കസ്റ്റഡിയിലെടുക്കാനുള്ള പോലീസിന്റെ ശ്രമം തടഞ്ഞതാണ് മൽപ്പിടുത്തത്തിന് ഇടയാക്കിയത്. ആറ് പോലീസുകാർ ചേർന്നാണ് യുവാവിനെ ജീപ്പിൽ കയറ്റിയത്. ഇതിനിടെ ബാദുഷയെ മർദ്ദിക്കുന്നത് ദൃശ്യങ്ങളിൽ വ്യക്തമാണ്. സംഭവം കണ്ടു നിന്നവരാണ് ദൃശ്യങ്ങൾ പകർത്തിയത്.
