ജീവിതത്തോളം രസമുള്ള ഒരു ഗെയിം ഞാൻ ഒരു പ്ലേ സ്റ്റോറിലും കണ്ടിട്ടില്ലെന്ന് പറഞ്ഞാണ് പോസ്റ്റ് ആരംഭിക്കുന്നത്. നെഗറ്റീവ് പറഞ്ഞ് തളർത്തുന്നവർക്കിടയിൽ പോസിറ്റീവായി ജീവിച്ചു കാണിക്കുന്നത് ഒരു ചലഞ്ച് തന്നെയാണ്. ശ്രീബുദ്ധൻ പറഞ്ഞതുപോലെ നമ്മുടെ ജീവിതം എന്നത് നമ്മുടെ മനസ്സിൻറെ മാത്രം സൃഷ്ടിയാണ്. ക്യാൻസറിനെ ഒരിക്കലും നിങ്ങളെ നിർവ്വചിക്കാൻ അനുവദിക്കരുത് മറിച്ച് നിങ്ങൾ ആയിരിക്കണം, നിങ്ങളുടെ ജീവിതം ആയിരിക്കണം ക്യാൻസറിനെ നിർവച്ചിക്കേണ്ടത് ശരത് വ്യക്തമാക്കുന്നു.
നല്ല ദിനങ്ങളും മോശം ദിനങ്ങളും ഉണ്ട് എങ്കിലും ആ ദിവസങ്ങളെ കൈകാര്യം ചെയ്യേണ്ടത് എങ്ങനെ എന്ന് തീരുമാനിക്കേണ്ടത് നമ്മൾ തന്നെയാണ്. പറക്കാൻ ചിറകുകൾ വേണമെന്നില്ല ഉള്ളിലൊരു ആകാശം ഉണ്ടായാലും മതി.
ക്യാൻസർ എൻറെ ജീവിതത്തിലേക്ക് രണ്ട് തവണയാണ് വന്നത് അതും ആഴ്ചകളുടെ വ്യത്യാസത്തിൽ. ആദ്യതവണ നേരിട്ടതിനെക്കാളും കൂടുതൽ മനസ്സാന്നിധ്യത്തോടെ ആണ് രണ്ടാംതവണ ഞാൻ അതിനെ നേരിടുന്നത്. സ്വന്തമായി ഒരു കിടപ്പാടം പോലുമില്ലാത്ത ഞാൻ അതിൻറെ മുന്നിൽ പകച്ചു നിന്നില്ല, ആശങ്കപെട്ടില്ല മറിച്ച് അതിനെ നേരിടാൻ എൻറെ മനസ്സിനെ പാകപ്പെടുത്താൻ മാത്രമാണ് ഞാൻ ശ്രമിച്ചത്. ഒന്നും കാത്തുസൂക്ഷിക്കാത്തവൻറെ ചുരുട്ടിപ്പിടിച്ച ഉള്ളംകൈയിൽ നിറയെ ഭംഗിയുള്ള ശൂന്യതകൾ ആണ്. “ഒന്നുമില്ല” എന്ന ഒറ്റ ഉത്തരത്തിൽ എത്രമാത്രം സങ്കടങ്ങളാണ് നമ്മളോരോരുത്തരും മറച്ചുവെക്കുന്നത്. മരണം കൊണ്ടു പോകാത്തത് ഒന്നേയുള്ളൂ ഈ ലോകത്ത്, മറ്റുള്ളവരുടെ ഉള്ളിൽ നിങ്ങൾ പതിച്ച പുഞ്ചിരി.
മനസ്സറിഞ്ഞ് നമുക്ക് ചിരിക്കാൻ കഴിയുന്ന കാലം വരെ നമ്മളെ തോൽപ്പിക്കാൻ ആർക്കുമാവില്ല, ഒന്നിനും ആവില്ല. ക്യാൻസറിന് എന്നെ പീഡിപ്പിക്കാൻ ആവും, എന്റെ ശരീരം നശിപ്പിക്കാൻ ആവും പക്ഷേ എന്റെ മനസ്സിനെ തളർത്താൻ ഒരിക്കലും സാധിക്കുകയില്ല. ഒഴുകുന്ന ജലവും പാറയും പലപ്പോഴും ഏറ്റുമുട്ടും, ജയിക്കുന്നത് എപ്പോഴും ജലം ആയിരിക്കും അതിൻറെ ശക്തി കൊണ്ടല്ല നിർത്താതെയുള്ള പരിശ്രമത്താൽ. ഒരു ചെറു പുഞ്ചിരി കൊണ്ട് ഒരു ഫോട്ടോ നന്നാക്കാം എങ്കിൽ എന്നും പുഞ്ചിരിച്ചാൽ ജീവിതവും നന്നാവുമെന്നും പറഞ്ഞാണ് ശരത് പോസ്റ്റ് അവസാനിപ്പിക്കുന്നത്.
ക്യാൻസർ വരുന്നതിനു മുൻപും അതിനു ശേഷവും എടുത്ത രണ്ട് ഫോട്ടോകളും പോസ്റ്റിന് ഒപ്പം അപ്ലോഡ് ചെയ്തിട്ടുണ്ട്.
