വനിതാ ടി20 ലോകകപ്പിന് ഇന്ന് തുടക്കമാകും

അബുദാബി: വനിതാ ടി 20 ലോകകപ്പ് മൽസരങ്ങൾ ഇന്ന് തുടക്കമാകും.രാഷ്ട്രീയ അനിശ്ചിതത്വത്തെ തുടർന്ന് ബംഗ്ലാദേശിൽ നിന്ന് വേദി യുഎഇയിലേക്ക് മാറ്റുകയായിരുന്നു. ഷാർജയിലും, ദുബായിലുമായാണ് മൽസരങ്ങൾ. യുഎഇ സമയം ഉച്ചക്ക് രണ്ടിന് ഷാർജയിൽ നടക്കുന്ന ഉദ്ഘാടന മൽസരത്തിൽ ബംഗ്ലാദേശ് അയർലൻഡിനെ നേരിടും. വൈകുന്നേരം ആറിന് ദുബായിൽ പാകിസ്ഥാൻ ശ്രീലങ്കയുമായി ഏറ്റുമുട്ടും.

വെള്ളിയാഴ്ച വൈകീട്ട് ദുബായിൽ ന്യൂസിലൻഡിനെതിരെയാണ് ഇന്ത്യയുടെ ആദ്യ മൽസരം. ഈമാസം ആറിന് ഉച്ചയ്ക്ക് രണ്ടിനായിരിക്കും ഇന്ത്യ പാക് പോരാട്ടം. ഇതുവരേ കിരീടം സ്വന്തമാക്കാത്ത ഇന്ത്യയ്ക്ക് ഇത്തവണ ഏതുവിധേനയും കപ്പ് നേടണമെന്ന ലക്ഷ്യമാണുള്ളത്. 2020ൽ ഇന്ത്യ ആദ്യമായി ടി20 ലോകകപ്പ് ഫൈനലിലെത്തി. എന്നാൽ അപ്രതീക്ഷിതമായി ഓസ്‌ട്രേലിയയോട് തോറ്റു. ക്രിക്കറ്റിൽ മികവ് പുലർത്തുന്ന ഓസീസ് വനിതാ ടീം ഇതുവരെ ആറ് തവണയാണ് ലോക കിരീടം നേടിയത്.

വയനാട് മാനന്തവാടി സ്വദേശി സജ്‌ന സജീവൻ, തിരുവനന്തപുരം പേരൂർക്കട സ്വദേശി ആശാ ശോഭന എന്നീ മലയാളികൾ കൂടി ഉൾപ്പെടുന്നതാണ് ഇന്ത്യൻ ടീം. ഇന്ത്യയുടെ എല്ലാമൽസരങ്ങൾക്കും ദുബായ് ക്രിക്കറ്റ് സ്റ്റേഡിയാണ് വേദി. പുരുഷ-വനിതാ മൽസരങ്ങളുടെ സമ്മാനതുക ഏകീകരിച്ചതിന് ശേഷം നടക്കുന്ന ആദ്യ ലോകകപ്പാണിത്.