രാഹുൽ ദ്രാവിഡ് വീണ്ടും ഐപിഎല്ലിലേക്ക്; സഞ്ജുവിന്റെ ടീമുമായി കരാർ

മുൻ ഇന്ത്യൻ താരവും ഇന്ത്യയുടെ മുഖ്യ പരിശീലകനുമായിരുന്ന രാഹുൽ ദ്രാവിഡ് ഐപിഎല്ലിലേക്ക് മടങ്ങിയെത്തുന്നു. മലയാളി താരം സഞ്ജു സാസംൺ നയിക്കുന്ന രാജസ്ഥാൻ റോയൽസിന്റെ മുഖ്യ പരിശീലക സ്ഥാനത്തേക്കാണ് ഇന്ത്യയുടെ വൻമതിൽ എത്തുന്നത്. 2025 ഐപിഎൽ സീസണിന് മുന്നോടിയായി ദ്രാവിഡ് രാജസ്ഥാൻ റോയൽസിനൊപ്പം ചേരും.

ദ്രാവിഡ് ടീമുമായി കരാർ ഒപ്പിട്ടതായി ഇഎസ്‌പിഎൻ റിപ്പോർട്ട് ചെയ്തു. മെഗാ താര ലേലത്തിന് മുന്നോടിയായി ടീമിൽ നിലനിർത്തേണ്ട കളിക്കാരെ സംബന്ധിച്ചുള്ള വിവരങ്ങൾ ടീമുമായി ചർച്ച ചെയ്തതായും റിപ്പോർട്ടുണ്ട്.

RAHUL DRAVID TO RAJASTHAN ROYALS…!!!
– Dravid is set to be the new Head Coach of Rajasthan Royals in IPL. [Espn Cricinfo] pic.twitter.com/VFjYzUVNvE
— Johns. (@CricCrazyJohns) September 4, 2024

2012, 2013 സീസണുകളിൽ രാജസ്ഥാൻ ക്യാപ്റ്റനായിരുന്ന രാഹുൽ ദ്രാവിഡ് 2014, 2015 സീസണുകളിൽ ഡയറക്ടറായും മെൻ്ററായും ടീമിനൊപ്പം പ്രവർത്തിച്ചു. 2016-ൽ, താരം ഡൽഹി ഡെയർഡെവിൾസിലെത്തി (ഡൽഹി ക്യാപിറ്റൽസ്). 2019-ൽ ബെംഗളൂരുവിലെ നാഷണൽ ക്രിക്കറ്റ് അക്കാദമി തലവനായി നിയമിതനായ ദ്രാവിഡ് 2021-ൽ, ഇന്ത്യൻ പുരുഷ ടീമിൻ്റെ മുഖ്യ പരിശീലകനായി സ്ഥാനമേറ്റു.

ദ്രാവിഡിൻ്റെ അസിസ്റ്റൻ്റ് കോച്ചുമാരിൽ ഒരാളായ മുൻ ഇന്ത്യൻ ബാറ്റിംഗ് പരിശീലകൻ വിക്രം റാത്തോറും രാജസ്ഥാനുമായി കൈകോർക്കാൻ സാധ്യതയുണ്ടെന്നാണ് റിപ്പോർട്ട്. നീണ്ട കാത്തിരിപ്പിനൊടുവിൽ ഇന്ത്യക്ക് ടി20 ലോകകപ്പ് നേടിക്കൊടുത്ത ദ്രാവിഡിനു കീഴിൽ രണ്ടാം കിരീടമാണ് രാജസ്ഥാന്റെ ലക്ഷ്യം. 2008ലെ ഉദ്ഘാടന സീസണിന് ശേഷം രാജസ്ഥാൻ ഇതുവരെ ഐപിഎൽ കിരീടം നേടിയിട്ടില്ല.