തിരുവനന്തപുരം> എഡിജിപി എം ആര് അജിത്കുമാര് ഉള്പ്പെടയുള്ള ഉന്നത പോലീസ് ഉദ്യോഗസ്ഥര്ക്കെതിരെ നല്കിയ പരാതിയില് വീണ്ടും പ്രതികരണവുമായി പി വി അന്വര്. താന് നല്കിയത് സൂചനാ തെളിവുകളാണ്. അത് അന്വേഷിക്കേണ്ടത് ഏജന്സികളാണ്. എനിക്ക് ഇവരെ ജയിലിലാക്കാന് കഴിയില്ല. എല്ലാത്തിനും നടപടിക്രമമുണ്ട്. അതു പ്രകാരം നടക്കും – അൻവർ പറഞ്ഞു.
ഉദ്യോഗസ്ഥര്ക്കെതിരായ പരാതി സിപിഎം സംസ്ഥാന സെക്രട്ടറി എം വി ഗോവിന്ദന് നല്കിയ ശേഷം മാധ്യമങ്ങളോട് സംസാരിക്കുകയായിരുന്നു അന്വര്.
ഇത് അന്തസ്സുള്ള സര്ക്കാരും മുഖ്യമന്ത്രിയും പാര്ട്ടിയും
“ഇത് അന്തസ്സുള്ള സര്ക്കാരും മുഖ്യമന്ത്രിയും പാര്ട്ടിയുമാണ്. അവരുടെ മുന്നിലാണ് എന്റെ പരാതി നല്കിയിട്ടുള്ളത്. ജനങ്ങളുടെ മുന്നിലാണ് ഞാന് കാര്യങ്ങള് തുറന്ന് പറഞ്ഞിട്ടുള്ളത്. ഹെഡ്മാസ്റ്ററെ കുറിച്ച് പരാതി നല്കിയാല് അദ്ദേഹത്തിന് കീഴിലുള്ള അധ്യാപകരും പ്യൂണും അല്ല അന്വേഷിക്കുക. അങ്ങനെയുള്ള ഒരു നയം ഉണ്ടാകുമോ. ഞാന് പരാതി നല്കിയിട്ട് ഒരു ദിവസമേ ആയിട്ടുള്ളൂ. അത് പഠിക്കട്ടേ. അതിന് നടപടിക്രമങ്ങളുണ്ട് അതു പ്രകാരം നടക്കും.”
എന്തിന് തൃശ്ശൂർപൂരം കലക്കി
നീതിപൂര്വ്വമായ അന്വേഷണം ഇക്കാര്യത്തില് നടക്കുമെന്നും കുറ്റവാളികള് ശിക്ഷിക്കപ്പെടുമെന്നും തന്നെ ഉറച്ച് വിശ്വസിക്കുന്നു. മുഖ്യമന്ത്രിക്ക് ഒരിക്കലും വീഴ്ചസംഭവിച്ചിട്ടില്ല. അദ്ദേഹം വിശ്വസിച്ച് ഏല്പ്പിച്ചവര് ഈ വിശ്വാസ്യത നിറവേറ്റിയോ എന്നാണ്. ഏല്പ്പിച്ചവന് അല്ല അതിന് ഉത്തരവാദി.
ഞാന് അത്രയും വിശദമായി പഠിച്ച് ജനങ്ങളുടെ വികാരം കണ്ടുകൊണ്ട് നില്ക്കുകയാണ്. എന്തുകൊണ്ട് ഈ പോലീസ് ഉദ്യോഗസ്ഥർ ജനങ്ങളെ നിരന്തരം വെറുപ്പിക്കുന്നു. എന്താണ് ഇതിന് കാരണം. എന്തുകൊണ്ട് തൃശ്ശൂര്പൂരം കലക്കുന്നു. ആ അന്വേഷണമാണ് എന്നെ ഇവിടെ എത്തിച്ചിട്ടുള്ളത്.
അഴിമതിക്കും അക്രമത്തിനും എതിരെ ജനങ്ങള് ആഗ്രഹിക്കുന്ന ഒരു സര്ക്കാരിനെതിരായ ലോബിക്കെതിരെയുള്ള പ്രവർത്തനമാണ് ഇത്. താൻ ഉയര്ത്തിയ വിഷയങ്ങളുമായി പൊതുസമൂഹത്തിന് മുന്നിലുണ്ടാകുമെന്നും പി വി അൻവർ പറഞ്ഞു.
