പാരീസ് ഒളിമ്പിക്സ് അവസാന ടൂര്‍ണമെന്റ്; വിരമിക്കൻ പ്രഖ്യാപിച്ച് ആൻഡി മുറെ

പാരീസ് ഒളിമ്പിക്‌സിന് ശേഷം ടെന്നീസിൽ നിന്ന് വിരമിക്കുകയാണെന്ന് സ്ഥിരീകരിച്ച് ആൻഡി മുറെ. എക്സിലൂടെയാണ് താരത്തിന്റെ വിരമിക്കൽ പ്രഖ്യാപനം. 37 കാരനായ മുറെയുടെ അഞ്ചാമത് ഒളിമ്പിക്സാണിത്. അവസാന ടൂർണമെന്റിൽ സിംഗിള്‍സ്, ഡബിള്‍സ് മത്സരങ്ങളില്‍ പങ്കെടുത്ത ശേഷമായിരിക്കും വിരമിക്കൽ.

ഒളിമ്പിക്സിൽ രണ്ട് സിംഗിൾസ് സ്വർണമെഡലുകൾ നേടിയ ഏക പുരുഷ താരമാണ് ആൻഡി മുറെ. എക്കാലത്തെയും മികച്ച ബ്രിട്ടീഷ് താരങ്ങളിൽ ഒരാളായി കണക്കാക്കപ്പെടുന്ന മുറെ, 2012 ലണ്ടൻ ഒളിമ്പിക്സിൽ റോജർ ഫെഡററെ ഫൈനലിൽ തോൽപ്പിച്ച് സ്വർണം നേടിയിരുന്നു.

Arrived in Paris for my last ever tennis tournament @Olympics
Competing for 🇬🇧 have been by far the most memorable weeks of my career and I’m extremely proud to get do it one final time! pic.twitter.com/keqnpvSEE1
— Andy Murray (@andy_murray) July 23, 2024

നാല് വർഷത്തിന് ശേഷം റിയോയിൽ ചാമ്പ്യൻഷിപ്പ് മത്സരത്തിൽ ജുവാൻ മാർട്ടിൻ ഡെൽ പോട്രോയെ മറികടന്ന് അദ്ദേഹം കിരീടം നിലനിർത്തി. പരിക്കുകൾക്കിടയിലും, 2013-ൽ വിംബിൾഡണിൽ ആദ്യത്തെ ബ്രിട്ടീഷ് പുരുഷ സിംഗിൾസ് ചാമ്പ്യനായി മുറെ ചരിത്രം സൃഷ്ടിച്ചു. 2016ലും നേട്ടം ആവർത്തിച്ചു.

ബ്രിട്ടനു വേണ്ടിയുള്ള മത്സരങ്ങൾ കരിയറിലെ ഏറ്റവും അവിസ്മരണീയമായ നിമിഷങ്ങളായിരുന്നുവെന്നും, അവസാന മത്സരങ്ങൾ രാജ്യത്തിനായി കളിക്കാൻ സാധിച്ചതിൽ അഭിമാനമുണ്ടെന്നും മുറെ പറഞ്ഞു.

2008ലെ ബെയ്ജിങ് ഒളിമ്പിക്‌സായിരുന്നു മറെയുടെ ആദ്യ ഒളിമ്പിക് ടൂര്‍ണമെന്റ്. ജൂലൈ 27നാണ് പാരീസ് ഒളിമ്പിക്സിലെ ടെന്നീസ് ഓപ്പണിംഗ് റൗണ്ടുകൾ റോളണ്ട് ഗാരോസിൽ ആരംഭിക്കുന്നത്. ഓഗസ്റ്റ് 4ന് ഇവൻ്റ് അവസാനിക്കുകയും, ഓഗസ്റ്റ് 2 മുതൽ മെഡൽ റൗണ്ടുകൾക്ക് തുടക്കമാകുകയും ചെയ്യും.