ശ്രേയസ് അയ്യർക്ക് ‘കണ്ടകശനി’? ഐപിഎല്‍ മത്സരങ്ങള്‍ നഷ്ടമായേക്കും

ഐപിഎല്ലിന് വീണ്ടും ഭീഷണിയായി യുവതാരങ്ങളുടെ പരുക്ക്. ഇന്ത്യന്‍ മദ്ധ്യനിര ബാറ്റർ ശ്രേയസ് അയ്യർക്ക് രഞ്ജി ട്രോഫി ഫൈനൽ മത്സരത്തിനിടെ പരിക്കേറ്റതാണ് ഷാരൂഖ് ഖാൻ്റെ ഉടമസ്ഥതയിലുള്ള കൊല്‍ക്കത്ത നൈറ്റ് റൈഡേഴ്‌സിന് തിരിച്ചടിയാകുന്നത്. രഞ്ജിയിൽ മുംബൈ താരമായ ശ്രേയസ് വിദർഭയ്‌ക്കെതിരായ ഫൈനലിന്റെ രണ്ടാം ഇന്നിങ്സില്‍ 95 റണ്‍സ് ഫോമിൽ തിരിച്ചെത്തിയിരുന്നു. ഇതിന് പിന്നാലെയാണ് താരത്തിന് പുറംവേദന അനുഭവപ്പെട്ടത്.

111 പന്തുകള്‍ നീണ്ട ഇന്നിങ്സില്‍ പുറംവേദനയെ തുടർന്ന് ശ്രേയസ് രണ്ട് തവണ ടീം ഫിസിയോയുടെ സഹായം തേടിയിരുന്നു. പിന്നീട് നാലാം ദിനം താരം ഫീല്‍ഡിങ്ങിന് ഇറങ്ങിയിരുന്നില്ല. സ്കാനിങ്ങിനായി താരത്തെ ആശുപത്രിയില്‍ പ്രവേശിപ്പിച്ചിരിക്കുകയാണ്. കഴിഞ്ഞ വർഷം സമാനമായ പരുക്കിനെ തുടർന്നാണ് താരം ശസ്ത്രക്രിയയ്ക്ക് വിധേയനായത്.

ഇതോടെ ഐപിഎല്ലിന്റെ ആദ്യ ഘട്ടത്തിൽ കെകെആർ താരമായ ശ്രേയസിന് നഷ്ടമായേക്കുമെന്ന റിപ്പോർട്ടുകളാണ് പുറത്തുവരുന്നത്. ഐപിഎല്‍ ആരംഭിക്കാന്‍ കേവലം 9 ദിനം മാത്രം ശേഷിക്കെയാണ് അയ്യരെ പരുക്ക് വലയ്ക്കുന്നത്. മാർച്ച് 22നാണ് ഐപിഎല്ലിന്റെ പുതിയ സീസണ്‍ ആരംഭിക്കുന്നത്. മാർച്ച് 23ന് സണ്‍റൈസേഴ്‌സ് ഹൈദരാബാദുമായാണ് കെകെആറിന്റെ ആദ്യ മത്സരം.

“പരുക്ക് അത്ര നിസാരമല്ല. നേരത്തെ പുറത്തിനേറ്റ പരുക്ക് ഗുരുതരമായിരിക്കുകയാണ്. ഐപിഎല്ലിന്റെ ആദ്യ ഘട്ടത്തിലെ മത്സരങ്ങള്‍ ശ്രേയസിന് നഷ്ടമാകാനാണ് സാധ്യത,” അടുത്ത വൃത്തങ്ങള്‍ പറഞ്ഞു. പുറംവേദനയെ തുടർന്ന് രഞ്ജിയിലെ രണ്ട് മത്സരങ്ങള്‍ ശ്രേയസിന് നഷ്ടമായിരുന്നു.

പരുക്ക് വീണ്ടും തന്നെ ബാധിച്ചെന്ന് ഇംഗ്ലണ്ട് പര്യടനത്തിനിടെ ശ്രേയസ് ഇന്ത്യന്‍ ടീം മാനേജ്മെന്റിനെ അറിയിച്ചിരുന്നു. എന്നാല്‍ ബെംഗളൂരുവിലെ ദേശീയ ക്രിക്കറ്റ് അക്കാദമിയില്‍ നടത്തിയ പരിശോധനയില്‍ പ്രത്യേകിച്ചൊന്നും കണ്ടെത്താന്‍ സാധിച്ചിരുന്നില്ല. ഇതോടെ ശ്രേയസിനെ കരാറില്‍ നിന്ന് ബിസിസിഐ പുറത്താക്കുകയും ചെയ്തു.