തൃശൂർ > അറിവിന്റെ ചിറകിലേറി അക്ഷരമുറ്റത്ത് അവർ വീണ്ടും പറന്നുയർന്നു. സൈലം –- ദേശാഭിമാനി അക്ഷരമുറ്റം ടാലന്റ് ഫെസ്റ്റ് 20-23ന് ആവേശോജ്വല തുടക്കം. സ്കൂൾതല മത്സരങ്ങളുടെ സംസ്ഥാനതല ഉദ്ഘാടനം തൃശൂർ ഗവ. മോഡൽ ബോയ്സ് ഹയർ സെക്കൻഡറി സ്കൂളിൽ വിദ്യാഭ്യാസമന്ത്രി വി ശിവൻകുട്ടി നിർവഹിച്ചു. നിറഞ്ഞ സദസ്സിൽ മന്ത്രി ക്വിസ് മാസ്റ്ററായി. ഉത്തരം പറയാനുള്ള കുട്ടികളുടെ തിടുക്കം ഉദ്ഘാടനവേദിയിൽ ആവേശമായി.
.jpg)
എൽപി, യുപി, ഹൈസ്കൂൾ, ഹയർ സെക്കൻഡറി വിഭാഗങ്ങളിലായി സംസ്ഥാനത്തെ 14,000 പൊതുവിദ്യാലയങ്ങളിൽ നടന്ന മത്സരത്തിൽ 45 ലക്ഷം വിദ്യാർഥികൾ പങ്കാളികളായി. വിജയിക്കുന്ന ആദ്യ രണ്ടു സ്ഥാനക്കാർക്ക് നവംബർ 11ന് നടക്കുന്ന ഉപജില്ലാതല മത്സരത്തിൽ പങ്കെടുക്കാം. ഉദ്ഘാടന ചടങ്ങിൽ ദേശാഭിമാനി ജനറൽ മാനേജർ കെ ജെ തോമസ് അധ്യക്ഷനായി.
സ്കൂൾമത്സരങ്ങളുടെ എറണാകുളം ജില്ലാ ഉദ്ഘാടനം പറവൂർ സമൂഹം ഹൈസ്കൂളിൽ നടൻ ബിജു ജയാനന്ദൻ നിർവഹിച്ചു. നഗരസഭാ പ്രതിപക്ഷനേതാവ് ടി വി നിഥിൻ അധ്യക്ഷനായി.
