ഷൊർണൂർ> ഭാരതപ്പുഴയിൽ സുഹൃത്തുക്കൾക്കൊപ്പം കുളിക്കാനിറങ്ങിയപ്പോൾ കാണാതായ യുവാവിന്റെ മൃതദേഹം കണ്ടെത്തി. കോട്ടയം ചങ്ങനാശ്ശേരി തൃക്കൊടിത്താനം കോട്ടമുറി ശിവഗംഗയിൽ ജിഷ്ണു എസ് നായർ ( 23 ) ആണ് മരിച്ചത്.
ഷൊർണൂർ റെയിൽവേ പാലത്തിനു സമീപം ചൊവ്വാഴ്ച വൈകിട്ട് 7 മണിയോടെയാണ് പുഴയിൽ കുളിക്കാനിറങ്ങിയത്. നീണ്ട തിരച്ചിലിനൊടുവിലാണ് യുവാവിന്റെ മൃതദേഹം ബുധനാഴ്ച രാവിലെ കണ്ടെത്തിയത്. അഞ്ചംഗസംഘത്തിലെ രണ്ടുപേർ പുഴയിലെ കുഴിയിൽ മുങ്ങിത്താഴുകയായിരുന്നു. ഇതിൽ ഒരാളെ ഒപ്പമുണ്ടായിരുന്നവർ രക്ഷപ്പെടുത്തി. ജിഷ്ണുവിനെ കണ്ടെത്താൻ കഴിയാത്തതിനാൽ ഇവർ വിവരമറിയിച്ചതിനനുസരിച്ച് ഫയർ ഫോഴ്സും ക്രിട്ടിക്കൽ കെയർ 24×7 എമർജൻസി ടീമും രാത്രി 9 മണി വരെ തിരച്ചിൽ നടത്തിയെങ്കിലും കണ്ടെത്താനായില്ല. പിന്നീട് രാവിലെയാണ് തിരച്ചിൽ പുന:രംഭിച്ചത്.
പാലക്കാട് നിന്ന് ഫയർ ഫോഴ്സും സ്കൂബ ടീം എത്തിയിരുന്നു. രാവിലെ 9 മണിയോടെയാണ് മൃതദേഹം കണ്ടെത്തിയത്. ഷൊർണൂർ മാർക്കറ്റിങ്ങ് രംഗത്ത് ജോലിചെയ്യുന്നാളാണ് മരിച്ച ജിഷ്ണു. അച്ഛൻ : സുരേഷ് .അമ്മ : ബീന. സഹോദരൻ : വിഷ്ണു.
