പുത്തൻകുരിശ് > കാമുകിയുമായി തര്ക്കിച്ച് ട്രാന്സ്ഫോർമറിനുമുകളില് കയറിയ കാമുകന് പൊള്ളലേറ്റ് ആശുപത്രിയില് ചികിത്സയില്. ബ്രഹ്മപുരം സ്വദേശിയെയാണ് പരിക്കുകളോടെ എറണാകുളത്തെ സ്വകാര്യ ആശുപത്രിയില് പ്രവേശിപ്പിച്ചത്.
കഴിഞ്ഞദിവസം പുലര്ച്ചെ 2.30ന് കിഴക്കമ്പലം ബസ് സ്റ്റാന്ഡിനുസമീപമാണ് സംഭവം. കാമുകിയെ പേടിപ്പിക്കാനാണ് ട്രാൻസ്ഫോർമറിൽ കയറിയത്. മുകളില് കയറി ലൈനില് പിടിക്കാന് ശ്രമിച്ചപ്പോള് ഷോക്കേറ്റ് തെറിച്ചുവീഴുകയായിരുന്നെന്ന് ദൃക്സാക്ഷികള് പറഞ്ഞു. വലിയ ശബ്ദത്തോടെ ലൈനില്നിന്ന് പൊട്ടിത്തെറി ഉണ്ടാകുകയും ലൈന് ഓഫാകുകയുംചെയ്തു. പൊട്ടിത്തെറിശബ്ദം കേട്ട് തൊട്ടടുത്തുള്ള കെഎസ്ഇബി ഓഫീസില് രാത്രി ഡ്യൂട്ടിയിലുണ്ടായിരുന്ന ജീവനക്കാരനായ വിജയബാബു ഉടന്തന്നെ യുവാവിന് പ്രഥമശുശ്രൂഷ നല്കി.
കെഎസ്ഇബിയുടെ ജീപ്പില്തന്നെ പഴങ്ങനാട് സ്വകാര്യ ആശുപത്രിയിലേക്ക് കൊണ്ടുപോയി. പിന്നീട് എറണാകുളത്തെ സ്വകാര്യ ആശുപത്രിയിലേക്ക് മാറ്റി. കൈകള്ക്കും കഴുത്തിനുതാഴെയും അരയ്ക്കുമുകളിലും പൊള്ളലേറ്റിട്ടുണ്ട്. പെട്ടെന്നുതന്നെ ലൈന് ഓഫായതിനാലാണ് ജീവന് തിരിച്ചുകിട്ടിയതെന്ന് കെഎസ്ഇബി ജീവനക്കാര് പറഞ്ഞു.
