വണ്ടൻമേട് > ഇടുക്കി വണ്ടൻമേട്ടിൽ ഏലത്തോട്ടത്തിൽ ദിവസങ്ങൾ പഴക്കമുള്ള മൃതദേഹം കണ്ടെത്തി. വാഴവീടിന് സമീപം 16 ഏക്കർ വരുന്ന ശിവാജി എസ്റ്റേറ്റിലെ തോട്ടത്തിലെ കാനയിലാണ് ദിവസങ്ങൾ പഴക്കമുള്ള പുരുഷ മൃതദേഹം കണ്ടെത്തിയത്. തിങ്കളാഴ്ച ജോലിക്കെത്തിയ തൊഴിലാളികളാണ് മൃതദ്ദേഹം കണ്ടെത്തിയത്. മുഖമടക്കം ജീർണിച്ച് നഗ്നമായി മലർന്നു കിടക്കുന്ന അവസ്ഥയിലായിരുന്നു മൃതദേഹം.
കഴിഞ്ഞ അഞ്ച് മുതൽ എസ്റ്റേറ്റിലെ ജോലികൾ താൽക്കാലികമായി നിർത്തിവച്ചിരുന്നു. തിങ്കളാഴ്ച വീണ്ടും ജോലി തുടരാൻ സ്ഥലമുടമ നിർദേശിച്ചതിനെ തുടർന്ന് എത്തിയ തൊഴിലാളികളാണ് മൃതദേഹം കണ്ടെത്. വണ്ടൻമേട്, കുമളി സ്റ്റേഷനുകളിലെ പൊലീസും ഡോഗ് സ്ക്വാഡും ഫോറന്സിക് സംഘവുമെത്തി പരിശോധിച്ചു. പത്തോളം ദിവസത്തെ പഴക്കമുണ്ടെന്നാണ് പ്രാഥമിക നിഗമനം. മൃതദേഹം കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി.
