കൊച്ചി> മലയാളത്തിന് മനസ്സുതുറന്ന ചിരിസമ്മാനിച്ച സൂപ്പർഹിറ്റ് സിനിമകളുടെ സംവിധായകൻ സിദ്ദിഖ് (68) അന്തരിച്ചു-. കൊച്ചിയിലെ സ്വകാര്യ ആശുപത്രിയിൽ ചൊവ്വ രാത്രി 9.10നായിരുന്നു അന്ത്യം. കരൾരോഗത്തെ തുടർന്ന് ഒരുമാസമായി ചികിത്സയിലായിരുന്നു. ന്യുമോണിയ ബാധിച്ച് നില മോശമായെങ്കിലും പിന്നീട് മെച്ചപ്പെട്ടു. ഞായറാഴ്ചയുണ്ടായ ഹൃദയാഘാതത്തോടെ അതീവ ഗുരുതരമായി.
ബുധൻ രാവിലെ ഒമ്പതുമുതൽ പന്ത്രണ്ട് വരെ കടവന്ത്ര രാജീവ് ഗാന്ധി ഇൻഡോർ സ്റ്റേഡിയത്തിൽ പൊതുദർശനത്തിന് വെക്കും. തുടർന്ന് കാക്കനാട് നവോദയ മനയ്ക്കടവിലെ വീട്ടിലെത്തിക്കും. ആറിന് എറണാകുളം സെൻട്രൽ ജുമാ മസ്ജിദിൽ ഖബറടക്കം. കൊച്ചി പുല്ലേപ്പടി സ്വദേശിയായ സിദ്ദിഖ് കാക്കനാട് നവോദയയിലായിരുന്നു താമസം. കറപ്പ്നൂപ്പിൽ പരേതരായ കെ എം ഇസ്മയിൽ ഹാജി–-സൈനബ ദമ്പതികളുടെ മകനാണ്. ഭാര്യ: ഷാജിദ. മക്കൾ: സുമയ്യ, സാറ, സുക്കൂൻ. മരുമക്കൾ: നബീൽ മെഹർ, ഷെഫ്സിൻ. സഹോദരങ്ങൾ: സലാഹുദ്ദീൻ, അൻവർ, സക്കീർ, സാലി, ഫാത്തിമ, ജാസ്മിൻ, റഹ്മത്ത്.
കൊച്ചിൻ കലാഭവൻ 1981ൽ ആദ്യമായി വേദിയിൽ അവതരിപ്പിച്ച മിമിക്സ് പരേഡിൽ പങ്കെടുത്ത ആറു കലാകാരന്മാരിൽ ഒരാളാണ്. പ്രിയ സുഹൃത്ത് ലാലിനൊപ്പം സംവിധായകൻ ഫാസിലിന്റെ സഹസംവിധായകരായി സിനിമയിൽ തുടക്കം. ഇരുവരും സത്യൻ അന്തിക്കാടിന്റെ പപ്പൻ പ്രിയപ്പെട്ട പപ്പൻ (1986) എന്ന ചിത്രത്തിന് തിരക്കഥയും നാടോടിക്കാറ്റ് (1987) സിനിമക്ക് കഥയുമെഴുതി. സിദ്ദിഖ്–-ലാൽ സംവിധായക കൂട്ടുകെട്ടിലെ ആദ്യസിനിമ റാംജി റാവു സ്പീക്കിങ് (1989) വൻവിജയമായി. ഇൻഹരിഹർ നഗർ, ഗോഡ്ഫാദർ, വിയറ്റ്നാം കോളനി, കാബൂളിവാല എന്നിവയിലും വിജയമാവർത്തിച്ചു. ഹിറ്റ്ലർ (1996) സിനിമയിലൂടെ സ്വതന്ത്ര സംവിധായകനായി. തുടർന്ന് ഫ്രണ്ട്സ്, ക്രോണിക് ബാച്ചിലർ, ബോഡി ഗാർഡ്, ലേഡീസ് ആൻഡ് ജെന്റിൽമാൻ, ഭാസ്കർ ദി റാസ്കൽ, ഫുക്രി എന്നീ ചിത്രങ്ങൾ. ബിഗ്ബ്രദർ (2020) അവസാന സിനിമ.
