കൊച്ചി > അഞ്ച് കോടി രൂപ ചെലവഴിച്ച് ചിത്രീകരിച്ച മലയാള സിനിമ ജയിലർ റിലീസ് ചെയ്യാൻ സാധിക്കുമോ എന്ന ആശങ്കയിലാണെന്ന് സംവിധായകൻ സക്കീർ മഠത്തിൽ വാർത്താസമ്മേളനത്തിൽ പറഞ്ഞു. ആഗസ്ത് 10നാണ് റിലീസ് തീരുമാനിച്ചിരിക്കുന്നത്. രജനീകാന്ത് നായകനായ ജയിലർ എന്ന തമിഴ് സിനിമയും അന്നേ ദിവസം റിലീസ് ചെയ്യുമെന്നാണ് വാർത്ത. ജയിലർ എന്ന പേര് താനാണ് ആദ്യം രജിസ്റ്റർ ചെയ്തതെന്ന് തമിഴ് സിനിമാപ്രവർത്തകരെ വക്കീൽനോട്ടീസ് മുഖാന്തിരം അറിയിച്ചിരുന്നു.
കേരള ഫിലിം ചേംബർ ഓഫ് കൊമേഴ്സിൽ 2021 ആഗസ്ത് 13ന് രജിസ്റ്റർ ചെയ്ത് നടപടിക്രമങ്ങളെല്ലാം പൂർത്തിയാക്കുകയും ചെയ്തിരുന്നു. അതിനുശേഷം ഒരു വർഷം കഴിഞ്ഞാണ് രജനീകാന്തിന്റെ സിനിമ സൗത്ത് ഫിലിം ചേംബറിൽ അതേ പേരിൽ രജിസ്റ്റർ ചെയ്തത്. ആദ്യം രജിസ്റ്റർ ചെയ്തിട്ടും തന്റെ സിനിമയുടെ പേര് മാറ്റണമെന്നാണ് രജനീകാന്തിന്റെ സൺ പിക്ചേഴ്സ് ആവശ്യപ്പെടുന്നത്. തന്റെ ചിത്രത്തിൽ ധ്യാൻ ശ്രീനിവാസനാണ് നായകൻ. മനോജ് കെ ജയൻ, ഉണ്ണിരാജ, ബിനു അടിമാലി തുടങ്ങിയവർ അഭിനയിക്കുന്നുണ്ട്. ചിത്രം റിലീസ് ചെയ്യാൻ കഴിഞ്ഞില്ലെങ്കിൽ കടുത്ത സാമ്പത്തിക പ്രതിസന്ധിയിലാകുമെന്നും അദ്ദേഹം പറഞ്ഞു. നടൻ ഉണ്ണിരാജയും വാർത്താസമ്മേളനത്തിൽ പങ്കെടുത്തു.
