കളമശേരി > പ്രധാനമന്ത്രി നരേന്ദ്ര മോദിയുടെ ഈജിപ്ത് സന്ദർശനവേളയിൽ ഭക്ഷണമൊരുക്കി വിളമ്പി നൽകിയത് ഏലൂർ പാണാട്ടിൽ അഷ്റഫിന്റെ മകൻ അനൂപ് അഷ്റഫ്. കെയ്റോ നൈൽ റിട്സ്കാൾടൺ ഹോട്ടലിൽ എക്സിക്യൂട്ടീവ് ഷെഫായി ജോലി ചെയ്യുകയാണ് അനൂപ്.ശനിയും ഞായറുമാണ് പ്രധാനമന്ത്രി ഹോട്ടലിൽ തങ്ങിയത്. ഈ സമയം ഭക്ഷണച്ചുമതല അനൂപിനായിരുന്നു. സംതൃപ്തനായ പ്രധാനമന്ത്രി അനൂപിനൊപ്പം ഫോട്ടോക്ക് പോസ് ചെയ്താണ് ഹോട്ടൽ വിട്ടത്. വിദേശമന്ത്രി ജയശങ്കറും ഒപ്പമുണ്ടായി.
വെള്ളിയാഴ്ചതന്നെ ഡൽഹിയിലും തിരുവനന്തപുരത്തുംനിന്നുള്ള ഉദ്യോഗസ്ഥർ അനൂപിന്റെ വീട്ടിലെത്തി ബാപ്പ അഷ്റഫിനോട് കുടുംബത്തെപ്പറ്റിയും മറ്റും അന്വേഷിച്ചിരുന്നു. സിപിഐ എം ഏലൂർ ലോക്കൽ കമ്മിറ്റി അംഗമാണ് അഷ്റഫ്.
കളമശേരി ഗവ. ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽനിന്നാണ് അനൂപ് പാചകവിദ്യ കരസ്ഥമാക്കിയത്. പാചകരംഗത്ത് 19 വർഷമായുണ്ട്. അനൂപ് 16 വർഷം വിദേശത്താണ് ജോലി ചെയ്തത്. കൊച്ചിയിലെ ട്രൈഡന്റ്, ലെ മെറിഡിയൻ എന്നിവയിലും ആലപ്പുഴയിലെ ഒബ്റോയ് വൃന്ദ എന്ന ആഡംബര യാനത്തിലും പ്രവർത്തിച്ചിരുന്നു. മൂന്നുവർഷമായി കെയ്റോയിലെ ഹോട്ടലിലാണ്. ഖത്തർ, ജിദ്ദ, മലേഷ്യ തുടങ്ങി ഒമ്പത് രാജ്യങ്ങളിലും ഒമാൻ രാജകുടുംബത്തിന്റെ ഷെഫായും പ്രവർത്തിച്ചു.
അനൂപ് അടുത്തദിവസം വീട്ടിലെത്തും. സിനിമാ സംവിധായകൻ നാദിർഷാ പിതൃസഹോദരീ പുത്രനാണ്. ഉമ്മ: സൈനബ. ഭാര്യ: സജന. മക്കൾ: സമ്റ, സാക്കി.
