പത്തനംതിട്ട > തിരുവല്ല കുടുംബ കോടതി വളപ്പിൽ ജഡ്ജിയുടെ വാഹനം അടിച്ചു തകർത്തു. അക്രമിയെ പൊലീസ് പിടികൂടി. ജയപ്രകാശ് എന്നയാളാണ് പിടിയിലായത്. വിവാഹമോചന ഹര്ജിയില് വിധി പറയാൻ വൈകുന്നതിൽ പ്രതിഷേധിച്ചായിരുന്നു അക്രമമെന്നാണ് റിപ്പോർട്ട്.
ബുധനാഴ്ച വൈകിട്ട് 4 മണിയോടെ തിരുവല്ല നഗരസഭാ പരിധിയിൽ പ്രവർത്തിക്കുന്ന കുടുംബകോടതി പരിസരത്തായിരുന്നു സംഭവം. ജയപ്രകാശിന്റെ വിവാഹമോചനക്കേസ് ഇവിടെ നടന്നു വരികയായിരുന്നു. ഇതിലുള്ള തീരുമാനം വൈകുന്നതിൽ പ്രകോപിതനായാണ് ഇയാൾ അക്രമം നടത്തിയതെന്നാണ് സൂചന.
മണ്വെട്ടി ഉപയോഗിച്ച് വാഹനത്തിന്റെ ചില്ലുകൾ അടിച്ചു പൊട്ടിക്കുകയായിരുന്നു. മറ്റു ഭാഗങ്ങളും തകർക്കാൻ ശ്രമിച്ചു. കാറിന്റെ ആറു ചില്ലുകളും തല്ലിത്തകർത്തു. ഇയാളെ പൊലീസ് വിശദമായി ചോദ്യം ചെയ്ത് വരികയാണ്.
