ന്യൂഡൽഹി > ജന്ദർ മന്ദിറിൽ സമരം ചെയ്യുന്ന ഗുസ്തി താരങ്ങൾക്ക് പിന്തുണയുമായി 1983 ൽ ലോകചാമ്പ്യന്മാരായ ഇന്ത്യൻ ക്രിക്കറ്റ് ടീം അംഗങ്ങൾ. ലൈംഗിക പീഡന കേസില് ഗുസ്തി ഫെഡറേഷന് പ്രസിഡന്റും ബിജെപി എംപിയുമായി ബ്രിജ് ഭൂഷന് സിംഗിനെതിരെ പ്രതിഷേധിക്കുന്ന താരങ്ങൾക്കാണ് പിന്തുണ അറിയിച്ചത്.
ഗുസ്തി താരങ്ങളെ തെരുവിലൂടെ വലിച്ചിഴച്ചത് ഏറെ ദുഃഖകരമാണ്. മെഡൽ ഗംഗയിൽ ഒഴുക്കാനുള്ള നീക്കം പോലുള്ള കടുത്ത നടപടികളിലേക്ക് താരങ്ങള് പോകരുത് എന്നും ഇതിഹാസ താരങ്ങള് ആവശ്യപ്പെട്ടു. നാളുകളായി പ്രതിഷേധത്തിലുള്ള വനിതകള് ഉള്പ്പടെയുള്ള ഗുസ്തി താരങ്ങളുടെ സമരം ക്രിക്കറ്റര്മാര് കണ്ടെന്ന് നടിക്കുന്നില്ല എന്ന വിമര്ശനങ്ങള്ക്കിടെയാണ് കപില് ദേവും സുനിൽ ഗവാസ്ക്കറും അടങ്ങുന്ന സംഘം പിന്തുണയുമായി രംഗത്തെത്തിയത്.
നിലവിലെ ബിസിസിഐ പ്രസിഡന്റ് റോജര് ബിന്നി, സുനില് ഗാവസ്കര്, കപില് ദേവ്, മൊഹീന്ദര് അമര്നാഥ്, കെ ശ്രീകാന്ത്, സയ്യിദ് കിര്മാനി, യഷ്പാല് ശര്മ്മ, മദന് ലാല്, ബല്വീന്ദര് സിംഗ് സന്ധു, സന്ദീപ് പാട്ടീല്, കിര്ത്തീ അസാദ് എന്നിവരാണ് 1983ലെ ലോകകപ്പ് നേടിയ ഇന്ത്യന് ടീമില് ഫൈനല് കളിച്ച താരങ്ങള്.
വിനേഷ് ഫോഗട്ട്, സാക്ഷി മാലിക്, ബജ്റംഗ് പൂനിയ തുടങ്ങിയ മുന്നിര താരങ്ങള് ഉള്പ്പടെയാണ് ബ്രിജ് ഭൂഷനെതിരെ പ്രതിഷേധവുമായി ജന്ദര്മന്ദിറിലുള്ളത്. മെയ് 28ന് ഡൽഹിയിലെ പുതിയ പാര്ലമെന്റ് മന്ദിരത്തിലേക്കുള്ള മാര്ച്ചിനിടെ ഇവരെ ഡൽഹി പൊലീസ് വലിച്ചിഴച്ചിരുന്നു. ഇതിന് ശേഷമാണ് മെഡലുകള് ഗംഗയിലൊഴുക്കാന് സാക്ഷി മാലിക് ഉള്പ്പടെയുള്ള ഗുസ്തി താരങ്ങള് ഹരിദ്വാറിലേക്ക് നീങ്ങിയത്. കര്ഷക നേതാക്കളുടെ ചര്ച്ചയെ തുടര്ന്നാണ് താരങ്ങള് മെഡലുകള് ഗംഗയില് ഒഴുക്കാനുള്ള ശ്രമത്തില് നിന്ന് പിന്വാങ്ങിയത്.
