തൃശൂര് > ക്രൈസ്തവരെ പ്രധാന ആഭ്യന്തര ശത്രുക്കളായി പ്രഖ്യാപിച്ച ആര്എസ്എസിന്റെ അടിസ്ഥാന ഗ്രന്ഥമായ വിചാര ധാരയെ തള്ളിപ്പറയാന് സംഘപരിവാര് തയ്യാറുണ്ടോയെന്ന് മന്ത്രി പി എ മുഹമ്മദ് റിയാസ്. ബിജെപി നേതാക്കള് ക്രിസ്തീയ സമുദായത്തില്പെട്ടവരുടെ വീടുകള് സന്ദര്ശിക്കുമ്പോള് ഈ ചോദ്യമാണുയരുന്നത്. തൃശൂരില് മാധ്യമ പ്രവര്ത്തകരുടെ ചോദ്യങ്ങള്ക്ക് വാര്ത്താ സമ്മേളനത്തില് മറുപടി പറയുകയായിരുന്നു അദ്ദേഹം.
വീടുകള് സന്ദര്ശിക്കുന്ന ബിജെപി നേതാക്കള്ക്ക് വിചാരധാര വായിച്ചുകൊണ്ടാണ് വീട്ടുകാര് മറുപടി നല്കുന്നത്. മതമേലധ്യക്ഷര്ക്കും വിചാരധാരയെ കുറിച്ച് ധാരണയുണ്ട്. വിചാരധാരയില് മൂന്ന് ആഭ്യന്തര ശത്രുക്കളുണ്ട്. ഇതില് പ്രധാന ആഭ്യന്തരശത്രു ക്രിസ്ത്യാനികളാണ്. മിഷനറി പ്രവര്ത്തകനായിരുന്ന ഗ്രഹാം സ്റ്റെയിനിനെയും കുടുംബത്തെയും ചുട്ടുകൊന്ന അനുഭവമുണ്ട്. ഇതെല്ലാം ബിജെപി നേതാക്കളോട് നേരിട്ട് ചോദിയ്ക്കാനുള്ള നല്ല അവസരമായാണ് അവരുടെ വീട് സന്ദര്ശനത്തെ ക്രിസ്ത്യന് സമുദായത്തില്പ്പെട്ടവര് കാണുന്നത്.
യുണൈറ്റഡ് ക്രിസ്ത്യന് ഫോറത്തിന്റെ 2022ലെ കണക്കു പ്രകാരം 598 ആക്രമണമാണ് ഇന്ത്യയില് ആര്എസ്എസ് വിചാരധാരയെ അടുസ്ഥാനപ്പെടുത്തി ക്രൈസ്തവര്ക്കുനേരെ നടത്തിയിട്ടുള്ളത്. 89 പാസ്റ്റര്മാര് ആക്രമിക്കപ്പെട്ടു. രാജ്യത്ത് 68 പള്ളികള് തകര്ത്തു. ആകെ 127 ആക്രമണങ്ങളില് 87 ഉം സംഘപരിവാറിന്റെ സംഘടിത കലാപം ആയിരുന്നു. 2020 ലും 21 ലും 104 ആക്രമണമാണ് സംഘപരിവാര് നടത്തിയത്.
കരോളുകള്പോലും ആക്രമിക്കപ്പെട്ടു. യുപിയില് കന്യാസ്ത്രീകള് ആക്രമിക്കപ്പെട്ടത് നമുക്കറിയാം. ഛത്തീസ്ഗഡിലെ നാരായണ്പൂരില് നൂറുകണക്കിന് അക്രമികള് ആയുധങ്ങളുമായി പള്ളികള് ആക്രമിച്ചത് മറക്കാറായിട്ടില്ല. മധ്യപ്രദേശിലും സമാന ആക്രമങ്ങള് നടന്നു. ഇതില് പ്രതികളായവര് സംഘപരിവാറിന്റെ ഉത്തരവാദപ്പെട്ട നേതാക്കളാണ്. ബിജെപിയുടെ പുതിയ നീക്കങ്ങള്കൊണ്ട് പൊതു രാഷ്ട്രീയ സാഹചര്യത്തില് ഒരു മാറ്റവും ഉണ്ടാക്കാന് പോകുന്നില്ലെന്നും മന്ത്രി റിയാസ് പറഞ്ഞു
