ന്യൂഡൽഹി> 2021ലെ ഐടിചട്ടങ്ങൾക്ക് കൊണ്ടുവന്ന ഭേദഗതികൾ ഉടൻ പിൻവലിക്കണമെന്ന് സിപിഐ എം പൊളിറ്റ്ബ്യൂറോ ആവശ്യപ്പെട്ടു. കേന്ദ്രസർക്കാരിനെ കുറിച്ചുള്ള ‘വ്യാജവും തെറ്റിദ്ധാരണജനകവുമായ’ വാർത്തകൾ കണ്ടുപിടിക്കാൻ പ്രസ് ഇൻഫർമേഷൻ ബ്യൂറോക്ക് (പിഐബി) അധികാരം നൽകുന്ന ഭേദഗതികളിലെ വ്യവസ്ഥ സെൻസർഷിപ്പ് ഏർപ്പെടുത്തുന്നതിന് തുല്യമാണ്. വ്യാജമെന്ന് പിഐബിക്ക് തോന്നുന്ന വാർത്തകളെല്ലാം ഫേസ്ബുക്ക്, ട്വിറ്റർ തുടങ്ങിയ സമൂഹമാധ്യമങ്ങളിൽ നിന്നും ഒഴിവാക്കണം.
വാർത്തകൾ ഒഴിവാക്കാനുള്ള നിർദേശം അനുസരിച്ചില്ലെങ്കിൽ കമ്പനികൾക്ക് ‘സേഫ് ഹാർബർ ഇമ്യൂണിറ്റി’ നഷ്ടപ്പെടും. സമൂഹമാധ്യമങ്ങളിൽ പോസ്റ്റ് ചെയ്യപ്പെടുന്ന നിയമവിരുദ്ധ ഉള്ളടക്കത്തിന്റെ ഉത്തരവാദിത്വത്തിൽ നിന്നും കമ്പനികൾക്ക് പരിരക്ഷ നൽകുന്നതാണ് വ്യവസ്ഥ. സമൂഹമാധ്യമങ്ങളെയും അതിന്റെ ഉപയോക്താക്കളെയും സെൻസറിങ്ങിന് വിധേയമാക്കുന്ന ജനാധിപത്യവിരുദ്ധ നീക്കം ഒരിക്കലും അംഗീകരിക്കാനാകില്ല. ഐടി ചട്ടഭേദഗതികൾ ഉടൻ പിൻവലിക്കണം–- സിപിഐ എം പിബി ആവശ്യപ്പെട്ടു.
