തിരുവനന്തപുരം> സംസ്ഥാനത്ത് കാസർകോട് മുതൽ തിരുവനന്തപുരം വരെ ആറുവരിപാതയാക്കാനുള്ള ദേശീയപാതാ വികസന പ്രവർത്തനങ്ങളിൽ അള്ളുവെയ്ക്കുന്ന പണിയാണ് ബിജെപി സംസ്ഥാന പ്രസിഡന്റ് കെ സുരേന്ദ്രൻ നടത്തുന്നതെന്ന് പൊതുമരാമത്ത് മന്ത്രി മുഹമ്മദ് റിയാസ്. ദേശീയപാത വികസനത്തിൽ കേന്ദ്രത്തോടൊപ്പം നിന്ന് ഇടപെടേണ്ടയിടങ്ങളിൽ ഇടപെട്ട് മാതൃകപരമായ പ്രവർത്തനമാണ് സംസ്ഥാന സർക്കാർ നടത്തുന്നത്. കേന്ദ്രമന്ത്രി നിതിൻ ഗഡ്കരിയും ദേശീയപാത അതോറിറ്റിയും സംസ്ഥാനസർക്കാരിനെ ഇക്കാര്യത്തിൽ അഭിനന്ദിച്ചിട്ടുമുള്ളതാണ് . എന്നിട്ടും കെ സുരേന്ദ്രൻ അതൊന്നും മനസിലാക്കാതെ സംസ്ഥാന സർക്കാർ എട്ടുകാലി മമ്മൂഞ്ഞാണ് എന്നും കാലണ നൽകിയിട്ടില്ല എന്നും വിളിച്ചു പറയുന്നത് ഇരട്ടത്താപ്പാണെന്നും റിയാസ് വാർത്തസമ്മേളനത്തിൽ പറഞ്ഞു. വികസന പ്രവർത്തനങ്ങൾക്ക് വേണ്ടി കേന്ദ്രം തുക അനുവദിക്കുന്നത് ഔദാര്യമല്ലെന്നും കേരളത്തിനെ് അവകാശപ്പെട്ടതാണെന്നും റിയാസ് പറഞ്ഞു.
ദേശീയ പാത വികസനത്തിന് ഭൂമിയേറ്റെടുക്കലിന് 25ശതമാനം സംസ്ഥാന സർക്കാർ വഹിക്കും എന്ന് നേരത്തെ പറഞ്ഞിട്ടുള്ളതാണ്. ദേശീയ പാത വികസനത്തിൽ സംസ്ഥാന സർക്കാരിന് വലിയ റോളുണ്ട്. മെറ്റീരിയൽസ് അടുപ്പിക്കൽ , ജിയോളജി , വനം , വെെദ്യുതി വകുപ്പുകൾ എന്നിവയുടെ പ്രവർത്തനം ഏകോപിപ്പിക്കുന്നത് എല്ലാം സംസ്ഥാന സർക്കാരാണ്. കൂടാതെ പ്രവർത്തനം പരിശോധിച്ച് എല്ലാ മാസത്തിലും റിവ്യൂ മീറ്റിങ് നടത്തിവരുന്നു. ചില മീറ്റിങ്ങുകൾ മുഖ്യമന്ത്രിയുടെ നേതൃത്വത്തിൽ നടക്കുന്നു. ഇതൊന്നും സുരേന്ദ്രൻ കാണുന്നില്ല.
കഴിഞ്ഞ ദിവസം പ്രധാന ദേശീയ മാധ്യമം ദേശീയ പാത വികസനത്തിൽ കർണാടകത്തേയും കേരളത്തേയും താരതമ്യം ചെയ്തിട്ടുണ്ട്. കർണാടകയിൽ ഒച്ചിന്റെ വേഗമാണെങ്കിൽ കേരളത്തിൽ മാതൃകാപരമാണ് എന്നാണ് വാർത്തയിൽ പറയുന്നത്. സംസ്ഥാന സർക്കാരിന്റെ ഇടപെടൽ മൂലമാണ്. ഫലപ്രദമായി കാര്യങ്ങൾ നടക്കുന്നത്. അത് സുരേന്ദ്രൻ അടക്കള്ള ജനങ്ങൾക്കുവേണ്ടിയാണ്. അതിന് വേണ്ടി ചട്ടിതൊപ്പിയല്ല എന്തുതൊപ്പിയിട്ടും പരിശ്രമിക്കും. അവിടെ ചട്ടിതൊപ്പിവെച്ച് ഷോകാണിക്കുന്നുവെന്ന് കളിയാക്കാനും അള്ളുവെയ്ക്കാനുമാണ് സുരേന്ദ്രൻ ശ്രമിക്കുന്നത് ഇരട്ടത്താപ്പാണെന്നും റിയാസ് പറഞ്ഞു.
