തളിപ്പറമ്പ്> കോടതി ജീവനക്കാരിയുടെ ദേഹത്ത് ആസിഡ് ഒഴിച്ച് പൊള്ളലേൽപ്പിച്ച സുഹൃത്ത് പിടിയിൽ. തളിപ്പറമ്പ് മുൻസിഫ് കോടതി ജീവനക്കാരി കൂവോട് സ്വദേശിനി കെ സാഹിദ (45)ക്കു നേരെയാണ് ആക്രമണമുണ്ടായത്. പൊള്ളലേറ്റ സാഹിദയെ തളിപ്പറമ്പിലെ സ്വകാര്യ ആശുപത്രിയിൽ പ്രവേശിപ്പിച്ചു. കൂവേരി സ്വദേശിയും സർ സയ്യിദ് കോളേജ് ക്ലർക്കുമായ അഷ്കറിനെ (52) നാട്ടുകാർ പിടികൂടി പൊലീസിൽ ഏൽപ്പിച്ചു.
തിങ്കൾ വൈകിട്ട് മാർക്കറ്റ് റോഡിലെ ന്യൂസ് കോർണർ ജങ്ഷനിലാണ് സംഭവം. ആക്രമണ കാരണം വ്യക്തമല്ല. സാഹിദയ്ക്കൊപ്പമുണ്ടായിരുന്ന കോടതിജീവനക്കാരൻ പ്രവീൺ തോമസ്, പത്രവിൽപ്പനക്കാരൻ ജബ്ബാർ എന്നിവർക്കും പൊള്ളലേറ്റു. വഴിയാത്രക്കാരുടെ ദേഹത്തും ആസിഡ് തെറിച്ചു. അഷ്കറിനെതിരെ പൊലീസ് കേസെടുത്തു.
