ചാവക്കാട് > പുന്നയൂർ പഞ്ചവടിയിൽ കാറും ലോറിയും കൂട്ടിയിടിച്ച് കോഴിക്കോട് സ്വദേശിയായ യുവാവ് മരിച്ചു. ചാവക്കാട് – പൊന്നാനി ദേശീയപാത 66 ൽ ബുധൻ രാവിലെ ആറോടെയാണ് അപകടം. കോഴിക്കോട് ചാലിയം കടുക്ക ബസാറിൽ കോട്ടക്കണ്ടി മുസ്തഫ (40) യാണ് മരിച്ചത്. മുസ്തഫയുടെ ബന്ധു അബൂബക്കർ (45),തമിഴ്നാട് സ്വദേശി ചന്ദ്രഹാസൻ(55) എന്നിവർക്കാണ് പരിക്കേറ്റത്.
കടുക്ക വ്യാപാരികളായ മുസ്തഫയും ഇദ്ദേഹത്തിൻ്റെ പിതാവിൻ്റെ സഹോദര പുത്രൻ അബൂബക്കറും കൊടുങ്ങല്ലരിലേക്ക് കല്ലുമ്മക്കായ വാങ്ങിക്കുന്നതിനായി പോകുന്നതിനിടെയാണ് അപകടം. പഞ്ചവടി ഭാഗത്തെത്തിയപ്പാൾ റോഡ് മുറിച്ചു കടക്കുകയായിരുന്ന ചന്ദ്രഹാസനെ രക്ഷിക്കാനുള്ള ശ്രമത്തിനിടെ നിയന്ത്രണം നഷ്ടപ്പെട്ട് എതിർദിശയിൽ നിന്നു വന്ന
ലോറിയുമായി കൂട്ടിയിടിക്കുകയായിരുന്നു. മുസ്തഫ തൽക്ഷണം മരിച്ചു. ഇടിയുടെ ആഘാതത്തിൽ മുൻഭാഗം പൂർണ്ണമായും തകർന്ന കാറ് വെട്ടി പൊളിച്ചാണ് അബൂബക്കറിനെ പുറത്തെടുത്തത്. ഭാര്യ: ജസീല. മക്കൾ:സുമൈല, മുനവ്വീർ ,ഷാൻവീർ.
