തിരുവനന്തപുരം> ലൈബ്രറികള് വായനയുടെ ജനാധിപത്യവല്കരണത്തിന്റെ ഭാഗമെന്നും എല്ലാ നാട്ടിലും ലൈബ്രറികള് ഉണ്ടാവണമെന്നും നിയമസഭ സ്പീക്കര് എഎന് ഷംസീര്. നിയമസഭാ അന്താരാഷ്ട്ര പുസ്തകോത്സവത്തിന്റെ ഭാഗമായി പാറശ്ശാല നിയോജകമണ്ഡലത്തിലെ 52 ഗ്രന്ഥശാലകള്ക്കും മണ്ഡലത്തിലെ മുഴുവന് പൊലീസ് സ്റ്റേഷനുകള്ക്കും സി കെ ഹരീന്ദ്രന് എംഎല്എയുടെ പ്രത്യേക വികസന ഫണ്ട് ഉപയോഗിച്ച് വാങ്ങി നല്കിയ പുസ്തകങ്ങളുടെ വിതരണോദ്ഘാടനവും മണ്ഡലത്തിലെ യുവ എഴുത്തുകാര്ക്കുള്ള സ്നേഹാദരവും നിര്വഹിച്ചു സംസാരിക്കുകായിരുന്നു അദ്ദേഹം.
വായന കുറയുന്നു എന്ന് പറയുന്നതില് കഴമ്പില്ലെന്ന് നിയമസഭ അന്താരാഷ്ട്ര പുസ്തകോത്സവം തെളിയിച്ചു. രണ്ടു ലക്ഷത്തിലേറെ പേരാണ് പുസ്തകോത്സവത്തില് പങ്കെടുക്കാന് എത്തിയത്. എല്ലാ പ്രസാധകരെയും സംതൃപ്തരാക്കിയാണ് നിയമസഭാ പുസ്തകോത്സവം സംഘടിപ്പിച്ചത് എന്നും സ്പീക്കര് പറഞ്ഞു.
അക്ഷര മധുരം എന്ന പേരില് അരുവിപ്പുറം മഠത്തില് നടന്ന പരിപാടിയില് പാറശ്ശാല എംഎല്എ, സി കെ ഹരീന്ദ്രന് അധ്യക്ഷനായി. കവി പ്രൊഫ. വി മധുസൂദനന് നായര് മുഖ്യാതിഥിയായി. അരുവിപ്പുറം മഠാധിപതി സാന്ദ്രാനന്ദ സ്വാമികള് മുഖ്യ സന്ദേശം നല്കി. പാറശ്ശാല നിയോജക മണ്ഡലത്തിലെ കുട്ടികളെയും മുതിര്ന്നവരെയും വായനയിലേക്ക് നയിക്കാനായി ‘സൂര്യകാന്തി’, ‘അക്ഷരമധുരം’ ഉള്പ്പെടെ വിവിധ പദ്ധതികളാണ് നടപ്പിലാക്കിയിട്ടുള്ളതെന്ന് സി കെ ഹരീന്ദ്രന് എം എല് എ പറഞ്ഞു.
‘അക്ഷരമധുര’ത്തിലൂടെ മണ്ഡലത്തിലെ ഗ്രന്ഥശാലകള്ക്ക് മന്ദിരം, കമ്പ്യൂട്ടര്, ഓണ്ലൈന് പഠന സംവിധാനം ഉള്പ്പെടെയുള്ള അടിസ്ഥാന സൗകര്യ വികസനവും നടത്തിവരികയാണെന്ന് അദ്ദേഹം പറഞ്ഞു. പരിപാടിയില് വിവിധ തദ്ദേശഭരണ ജനപ്രതിനിധികള്, ഗ്രന്ഥശാലാ, സാംസ്കാരിക പ്രവര്ത്തകന് തുടങ്ങിയവര് പങ്കെടുത്തു.
