ഗുവാഹത്തി> വിരാട് കോഹ്ലിയുടെ സെഞ്ചറിക്കരുത്തിൽ ശ്രീലങ്കയ്ക്കെതിരെവമ്പൻ വിജയ ലക്ഷ്യമുയർത്തി ഇന്ത്യ. നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ ഇന്ത്യ 373 റൺസെടുത്തു. 80 പന്തുകളിൽനിന്നാണ് കോലി ഏകദിന കരിയറിലെ 45–ാം സെഞ്ചറി തികച്ചത്. ഇതോടെ കരിയറിലെ സെഞ്ചറികളുടെ എണ്ണം 73 ആയി.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്ക് വേണ്ടി തകർപ്പൻ തുടക്കമാണ് ഓപ്പണർമാരായ രോഹിത് ശർമയും ശുഭ്മാൻ ഗില്ലും ചേർന്ന് നൽകിയത്. രോഹിത്താണ് കൂടുതൽ ആക്രമിച്ച് കളിച്ചത്. 67 പന്തുകൾ നേരിട്ട രോഹിത് 83 റൺസെടുത്തപ്പോൾ 60 പന്തിൽ നിന്ന് ശുഭ്മൻ ഗിൽ 70 റൺസ് നേടി.
