കാസർകോട്> ജനവാസ മേഖലകളിലും കൃഷിയിടങ്ങളിലും തമ്പടിച്ച കാട്ടാനകളെ ഉടൻ തുരത്തുക, എല്ലാ വന്യജീവികളും നടത്തുന്ന കൃഷിനാശം തടയാൻ നടപടി സ്വീകരിക്കുക, കൃഷിനാശത്തിനായുള്ള നഷ്ടപരിഹാരത്തുക വർധിപ്പിച്ച് അടിയന്തിരമായി വിതരണം നടത്തുക, ആനപ്രതിരോധ പദ്ധതി അടിയന്തിരമായി പൂർത്തീകരിക്കുക എന്നീ ആവശ്യങ്ങളുമായി സിപിഐ എം കാറഡുക്ക ഏരിയാ കമ്മിറ്റി ജില്ലാ വനം ഓഫീസിലേക്ക് മാർച്ചും രാപ്പകൽ സത്യഗ്രഹ സമരം സംഘടിപ്പിച്ചു.
വിദ്യാനഗർ മധൂർ റോഡ് കേന്ദ്രീകരിച്ച് നടന്ന മാർച്ചിൽ സ്ത്രീകളും കർഷകരും ഉൾപെടെ നൂറുകണക്കിനാളുകൾ പങ്കെടുത്തു. തുടർന്ന് ജില്ലാ വനം ഓഫീസിന് മുന്നിൽ രാപ്പകൽ സത്യാഗ്രഹ സമരം സംസ്ഥാന കമ്മിറ്റിയംഗം സി എച്ച് കുഞ്ഞമ്പു എംഎൽഎ ഉദ്ഘാടനം ചെയ്തു. ഏരിയാ കമ്മിറ്റിയംഗം കെ ശങ്കരൻ അധ്യക്ഷനായി. ജില്ലാ കമ്മിററിയംഗം സിജി മാത്യു, ദേലമ്പാടി, മുളിയാർ പഞ്ചായത്ത് പ്രസിഡൻ്റുമാരായ എ പി ഉഷ, പി വി മിനി എന്നിവർ സംസാരിച്ചു. ഏരിയാ സെക്രട്ടറി എം മാധവൻ സ്വാഗതം പറഞ്ഞു.
മാർച്ചിന് എം മാധവൻ, സിജി മാത്യു, കെ ശങ്കരൻ, പി ബാലകൃഷ്ണൻ, സി കെ കുമാരൻ എന്നിവർ നേതൃത്വം നൽകി. 100 വളണ്ടിയർമാർ മുഴുവൻ സമയവും സമരവേദിയിലുണ്ടാകും. ജനപ്രതിനിധികൾ, കർഷകർ, സിപിഐ എം നേതാക്കൾ എന്നിവർ പങ്കെടുക്കും. വർഗ ബഹുജന സംഘടനകൾ സമരത്തിന് പിന്തുണ നൽകും.
